Nishani takon Cannon: Reforma në
 drejtësi ka një rëndësi vendimtare 

Presidenti i Republikës, Bujar Nishani zhvilloi një takim me Ambasadorin e Mbretërisë së Bashkuar në Tiranë, Nicholas Cannon . Gjatë takimit u bisedua rreth nivelit të kënaqshëm të bashkëpunimit mes dy vendeve, duke u përqendruar në mënyrë të veçantë në bashkëpunimin në fushën e drejtësisë.
 
Presidenti Nishani vlerësoi se reforma në fushën e drejtësisë është e një rëndësie vendimtare për vendin dhe se ajo është e lidhur ngushtë me të tjera reforma të rëndësishme në fushën e zbatimit të ligjit si dhe me zhvillimin ekonomik të vendit, përfshirë impaktin e drejtpërdrejtë në shoqëri. Ai siguroi se, Presidenti i Republikës mbetet plotësisht i përkushtuar dhe i vendosur për të bërë çdo përpjekje për ta çuar këtë reformë përpara. Duke nënvizuar rolin vendimtar që ka vullneti i aktorëve të përfshirë në proces për përparimin apo dështimin e kësaj reforme, Kreu i Shtetit rikonfirmoi angazhimin e tij të plotë institucional për rikthimin e besimit ndaj këtij procesi, përparimin e tij, si dhe për vijimin e bashkëpunimit me partnerët kyç, të ftuar edhe në Konferencën e 6 tetorit, si EURALIUS, OSBE, OPDAT, Komisioni i Venecias dhe Fondacioni Slynn.
 
Ambasadori Cannon vuri në dukje se reforma në drejtësi është pjesë e paketës tërësore për 5 prioritetet e Bashkimit Europian, dhe se është shumë e rëndësishme që ajo të jetë gjithëpërfshirëse. “Vetëm një reformë e suksesshme dhe e qëndrueshme në sistemin e drejtësisë mund të çojë vendin përpara.” - theksoi Ambasadori Cannon. Duke shpresuar në funksionimin e plotë të Komisionit Parlamentar ad hoc për reformën në drejtësi, Ambasadori informoi se si Komisioni i Venecias ashtu edhe Fondacioni Slynn do të jenë pjesë e reformës qoftë në hartimin e strategjisë, qoftë në hartimin e ligjeve përkatëse. Ai mirëpriti rolin drejtues, monitorues dhe motivues të Presidentit në këtë proces, me besimin se ky oportunitet për realizimin e reformës nuk do të humbet.


Redaksia Online
(a.h/shqiptarja.com)
 

TAG:
• OSBE