Nishani thirrje demokratëve në Lushnjë të behën pjesë e protestës së Berishës: Përgatitemi të marrim përsipër drejtimin e fateve të vendit

Në Lushnjë është festuar 31-vjetori i krijimit të degës së Partisë Demokratike në këtë qytet. Me këtë rast në hollin e qendrës së kulturës ‘Vaçe Zela’, ishin mbledhur themelues e anëtare dhe simpatizantë të PD-së si dhe të ftuar.

Gjithashtu në festë ka marrë pjesë edhe ish-presidenti i Shqipërisë Bujar Nishani, si dhe Tritan Shehu e figura të tjerë qendrore të PD-së, kryesisht mbështetës të Sali Berishës, në lëvizjen e tij kundër Bashës. Të pranishmit i përshëndeti kryetari i parë dhe themeluesi i degës Lushnjë, Kujtim Gina.

Ish-presidenti i Shqipërisë, në fjalën e tij ndër të tjera përgëzoi anëtarët e PD-së, Lushnje për kontributin e tyre ndër vite si dhe aktualisht në mbështetje të Rithemelimit të PD-së, duke përshëndetur Sali Berishën. Nishani u bëri thirrje anëtarëve të PD-së që të bëhen pjesë e protestës së thirrur nga Berisham dhe të mblidhen në seli, pasi sipas tij duhet të përgatiten që të marrin në drejtim fatet e vendit.

‘Sot dëshiroj të kemi motivimin që bashku të çojmë para këtë aksion politik që kemi nisur për Partinë Demokratike. Kjo është në betejë që kurrë nuk mbaron, por ne nuk dorëzohemi dhe sot më shumë se kurrë kërkohet ky angazhim. Të shtunën me 8 janar,në selinë e PD-së do të nisim një protestë të madhe kombëtare, e cila ka të bëjë me vendosjen e parimeve dhe themeleve të lirisë. Një protestë që do të tregojë se demokratët as nuk shiten dhe as nuk blihen dhe as nuk tregtojnë, dimensionin e tyre, shtëpinë e tyre dhe vizionin e tyre. Të mblidhemi në selinë e PD-së në Tiranë më 8 janar për të demonstruar edhe një herë vizionin tonë, këmbnguljen tonë, besimin se vlerat e lirisë dhe dinjitetit të secilit prej nesh, nuk mund të shkojnë dëm. Së shpejti të përgatitemi për të marrë përsipër drejtimin e fateve të vendit.’-tha Nishani.

Gjithashtu Nishani kërkoi nga demokratët e Lushnjës që të jenë të pranishëm në datën 8 janar në orën 12 në protestën kombëtare të thirrur nga Sali Berisha për largimin e Lulzim Bashës.

M.Q./r.k./Shqiptarja.com

TAG:
• PD
• Fier
• TRITAN SHEHU
• Bujar Nishani
• lushnje