Nisja e zbatimit të marrëveshjes Kosovë-Serbi për dokumentet, BE: Hap pozitiv

Nisja e zbatimit të marrëveshjes ndërmjet Kosovës dhe Serbisë për dokumentat për hyrje-dalje është mirëpritur nga Bashkimi Evropian.

Në bazë të kësaj marrëveshjeje të dyja shtetet janë dakordësuar për të hequr dokumentet shtesë, kur qytetarët të hyjnë në territorin e njëra-tjetrës.

“Ky është hap pozitiv, i cili do të lehtësojë lirinë e lëvizjes dhe një zgjidhje evropiane”, thuhet ndër të tjerash në reagimin e Bashkimit Evropian.

Më 1 shtator ka nisur procesi i riregjistrimit të makinave me targat që lëshohen nga Serbia, me akronime të Kosovës, sikurse KM, PZ e të ngjashme. Prishtina i konsideron ilegale këto targa dhe ka thënë se me procesin e riregjistrimit, qytetarët në veri do të përfitojnë lehtësira të tjera tatimore, që mund të arrijnë vlerën e 5.000 eurove. BE-ja ka kërkuar që Kosova të ofrojë kohë të mjaftueshme për riregjistrim.

Blloku evropian ka thënë se Kosova ka të drejtë t’i japë fund përdorimit të këtyre targave, por nuk ka përmendur targat RKS.

“Qëndrimi i BE-së për çështjen e targave është bërë i qartë në disa raste. Sipas marrëveshjeve të arritura në kuadër të dialogut më 2011 dhe 2016 për lirinë e lëvizjes, Kosova ka të drejtë t’i japë fund përdorimit të targave KM. Megjithatë, është me rëndësi që të jepet kohë e mjaftueshme për zbatimin e këtij plani dhe që ai të përgatitet e zbatohet në konsultim të ngushtë me qytetarët për të cilët vlejnë, në përputhje me praktikat e mira evropiane”./REL

 

Lajmi kryesor:

'E kaluam kufirin sikur të ishte BE', dita e parë e reciprocitetit Kosovë-Serbi

S.C/Shqiptarja.com

TAG:
• kosove-serbi
• reciprociteti
• kosove