DURRËS-Pa patentë, një mal me gjoba dhe për më tepër kundërshton policinë dhe i ikën me shpejtësi me makinë duke mos iu bindur urdhrit të bluve. Ky është reperi Rigels Jaku, i njohur me emrin muzikor, Noizy ndaj të cilit ka nisur procedim penal nga policia.

Reperi i njohur eshte ndalur per kontroll nga policia e Durrësit në segmentin rrugor Ura e Dajlanit-Plepa, nga ku rezultoi se këngëtari nuk ishte pajisur me leje drejtimi dhe kishte disa gjoba të papaguara.

Noizy, i ka ikur policisë me shpejtësi në momentin që efektivët i kanë dhënë urdhërin e shoqërimit në komisariat. 

Policia e Durrësit e ka ndjekur dhe e ka kapur pak kilometra larg duke i sekuestruar makinën me të cilën udhëtonte këngëtari, një automjet tip Benz me targa AA 517 MT. 

Burime për Report Tv mësojnë se Noizy është liruar pasi është mbajtur 6 orë në komisariat, por nuk është pushuar procedimi penal ndaj tij. 

Njoftimi nga Policia
"Specialistët për Krimet në Komisariatin e Policisë Durrës filluan procedimin penal në ngarkim të shtetasit:
• Rigers Rajku 30 vjeç, banues në Durrës.
Më datë 16.12.2016, në segmentin rrugor Ura e Dajlanit-Plepa, duke drejtuar  mjetin tip Benz  me targa AA 517 MT, është ndaluar nga Efektivet e Qarkullimit Rrugor.
Uniformat blu i kanë kërkuar dokumentacionin e mjetit  dhe nga kontrolli u evidentua se nuk kishte leje drejtimi me vete dhe gjoba të papaguara.
Në vijim i është dhënë urdhër që të shoqërohet në ambientet e Komisariatit, (deri në momentin që ndonjë person të sillte lejen e tij të drejtimit dhe të paguante gjobat), por ai nuk i është bindur punonjësve  të policisë dhe është larguar së bashku me mjetin.
Menjëherë Efektivet e Policisë janë vënë në ndjekje të tij dhe kanë bërë të mundur kapjen dhe shoqërimin e tij së bashku me mjetin në Komisariat.
Mjeti është sekuestruar.
Pas kryerjes së veprimeve procedurale materialet i kaluan Prokurorisë së Rrethit Gjyqësor Durrës për veprime të mëtejshme për veprën penale"Mosbindja ndaj urdhërit të punonjësit të policisë së rendit publik"parashikuar në nenin 242  të Kodit Penal".


makina noizy
 (Makina e Noizyt e sekuestruar nga Policia Rrugore)

Redaksia Online
XH.K/d.b/Shqiptarja.com