Nuk gjen qetësi toka në Turqi, vendi tronditet nga tërmete të fuqishme dy javë pas lëkundjeve shkatërrimtare, 8 të vdekur, mbi 600 të plagosur

Ministri i Mbrojtjes Niko Peleshi ka shprehur mirënjohje për ekipin e kërkim shpëtimit që u kthye nga Turqia ku ndihmoi në operacionet për nxjerrjen nga rrënojat të personave të mbijetuar. Në një postim të bërë në facebook, ku e shoqëron edhe me një video, ku flasin anëtarë të ekipeve të shpëtimit. 

"Më shumë se mirënjohje për efektivët e guximshëm të Forcave të Armatosura që u përfshinë pa u lodhur në operacionet e kërkim-shpëtimit pas tërmetit shkatërrues në Turqi.  Përpjekjet dhe puna juaj e lavdërueshme, na e ngrenë kokën lart dhe na bëjnë të ndjehemi krenarë që ishim ndihmë në ditë të vështira për ata që patën nevojë"-shkruan Peleshi.

 

Deputeti turk, Lütfi Kaşıkçı, i cili ishte në Hatay duke dhënë një prononcim për mediat për situatën aktuale kur nisën lëkundjet e forta të tërmetit 6.4 ballë.

Ai u pa duke u larguar me vrap pasi ishte shumë pranë godinave të mëdha. Ky moment u filmua nga kamerat e sigurisë që tregonin deputetin që largohej me shpejtësi.

Shumë ndërtesa të dëmtuara nga 2 tërmetet në Turqi u shkatërruan nga lëkundja e mbrëmshme 6.4 ballë. Nga godina e Fakultetit të Arkitekturës në Universitetin Mustafa Kemal, gjithcka është rrafshuar përvec shkallëve të emergjencës.

Aty duket qartë se vetëm shkallët që përdoren në raste emergjence mbeti në këmbë ndërsa godina u rrëzua e gjitha.

Gjeoshkencëtari turk, Naci Görür ka bërë një paralajmërim sa i përket tërmeteve të ardhshme që mund të godasin Turqinë. Pas tërmeteve të forta që tronditën zonën e Hataj, mbrëmjen e djeshme, gjeoshkencëtari tha se tashmë kjo zonë e ka çliruar të gjithë energjinë e mbledhur dhe se rradhën e ka Stambolli, qyteti me më shumë banorë në vend. 

“Hatay e ka zbrazur energjinë, koha po afrohet për Stambollin, nëse nuk përgatitemi, do të jetë shkatërrues për vendin tonë”, tha ai për mediat turke.

“Unë dhe miqtë e mi gjeoshkencëtarë i bëmë këto paralajmërime, por askush nuk na dëgjoi dhe nuk na e vuri veshin. Jo vetëm që nuk u konsultuam, por edhe fotografia e tërmeteve në Kahramanmaras tregonte se nuk kishte përgatitje të mjaftueshme”, shtoi Gorur.