Obeziteti: Gjendet “depozita”
sekrete e indit dhjamor!

TIRANE- Kërkuesit e Universitetit Politeknik të drejtuara nga Saverio Cinti kanë zbuluar që qelizat endoteliale janë “depozitat” e qelizave burimore të indit dhjamor. Ky është një kërkim i cili ka zgjatur për vite me rradhë dhe që i hap dyert terapive të reja kundër obezitetit, diabetit dhe aterosklerozës.

“Kemi identifikuar qelizën prej së cilës merr origjinën adipociti ( qeliza dhjamore), ndërsa deri më sot ishim në errësirë të plotë mbi origjinën e tyre” , thotë Saverio Cinti. Qelizat burimore të indit dhjamor kanë një rëndësi shumë të madhe “karakterizohen nga aftësi rigjeneruese të larta”. E reja është se tani njihet prejardhja e tyre, fakt ky që na e bën më të thjeshtë të kuptojmë mekanizmin adrenergjik nëpërmjet të cilit, i stimuluar nga i ftohti, indi i bardhë adipoz transformohet në kaf.

Te kafshët, në fakt kur temperatura ulet, qelizat e bardha kthehen në kafe për t’i mbrojtur ato nga obeziteti dhe diabeti. “Është dhe një e re tjetër- shton Cinti- që hap fusha të reja interesante: zbulimi i një hormoni : Irisina- i prodhur nga muskujt i cili gjatë aktiviteteve fizike hyn në qarkullimin e gjakut dhe ka një ndikim të madh transformues mbi qelizat dhjamore”. Objektivi është të kuptojmë mekanizmat molekulare thelbësore për të luftuar obezitetin. Kjo do të lehtësojë studimin e elasticitetit të indit dhjamor, se si ndodh riprogramimi i këtyre qelizave dhe kthimi i tyre nga të bardha në kafe. Rimodelimi i programit të saj gjenetik, do të thotë se mund të kontrollojmë elasticitetin e indeve për të krijuar trajtime të reja mjekësore.
(sg/shqiptarja.com)