ODIHR rivjen në Tiranë:Zgjedhjet
e ardhshme të jenë më të mira

TIRANE- Ministri i Jashtëm, Ditmir Bushati zhvilloi një takim me delegacionin e e ODIHR-it, kryesuar nga amerikania Conny McCormack, si kryetare e Misionit të vëzhgimit të zgjedhjeve të 23 qershorit. Më pas ata mbajtën një konferencë të përbashkët për median.

Së pari, ministri i Jashtëm Bushati theksoi në fjalën e tij se “OSBE-ODHIR do të vëzhgojë reformat, në mënyrë që t’i paraprijmë zgjedhjeve vendore. Ishte kënaqësi që mora gatishmërinë e tyre për ta ndihmuar Shqipërinë për këtë proces. Është proces që ka të bëjë me demokratizimin e vendit dhe përmirësimin e cilësisë së qeverisjes”.

McCormak, pasi shprehu kënaqësinë që të rikthehet për pak ditë në Shqipëri pas zgjedhjeve të 23 qershorit, theksoi se “jam kthyer për rekomandimet e raportit përfundimtar për zgjedhjet, për të parë rekomandimet me përfaqësues të partive në Kuvend, të papërfaqësuara në Kuvend dhe të shoqërisë civile”.

Mccromak kujtoi se kjo është një praktikë e njohur në të kaluarën, se OSBE-ODHIR kanë vëzhguar 11 zgjedhje parlamentare në Shqipëri, dhe se "po punojmë për të identifikuar prioritetet, që zgjedhjet e ardhshme të jenë më të mira".

"Vizita sapo ka filluar. Ky takimi i parë. Ne do vazhdojë me takime të tjera gjatë kësaj vizite dyditore. Presim të kemi takime të frytshme, bashkëpunuese dhe vlerësojmë interesimin tuaj për to”, tha McCormak.  

OSBE-ODHIR NË ZGJEDHJET E 23 QERSHORIT
Ekipi i vëzhguesve të OSBE/ODIHR për zgjedhjet e 23 qershorit në Shqipëri mbërriti nën drejtimin e amerikanes Conny Mc Cormack. Ai përbëhej nga 430 vëzhgues, ekspertë të çështjeve zgjedhore, që erdhën nga 14 shtete anëtare të OSBE-së, që u shpërndanë në të gjitha rajonet e vendit. Analizimi i listave të zgjedhësve si dhe aplikimi i ligjit për monitorimin e medias gjatë fushatës, qenë disa prej detyrave kryesorë të këtij grupi. Në përfundim të procesit, shefja e misionit të ODIHR, Conny McCormack vlerësoi pozitivisht organizimin e ditës së votimit, duke theksuar se zhdukja e radhëve në votim, si pasojë e uljes së numrit të zgjedhësve për qendër votimi, ishte një përmirësim i dukshëm. Ajo u shpreh se procesi i numërimit shënoi gjithashtu përmirësim. McCormak theksoi se është i rëndësishëm fakti që ky proces tregoi pjekurinë e demokracisë në Shqipëri.

Redaksia Online
(mag/sg/shqiptarja.com)

TAG:
• OSBE