OKB/Vuçiç: Qëndrimi i pandryshuar i Greqisë ndaj Pavarësisë së Kosovës, është jetik për Serbinë

Aleksandar Vuçiç dhe Kyriakos Mitsotakis janë takuar në Nju Jork ku ndodhen në punimet e Asamblesë së Përgjithshme të OKB-së.

Sipas Presidencës serbe, Vuçiç ka kërkuar nga kryeministri grek Mitsotakis që të mos ndryshojë qëndrim sa i përket pavarësisë së Republikës së Kosovës.

Vuçiç e ka konsideruar jetik për vendin e tij pozicionin e Greqisë për të mos e njohur Republikën e Kosovës.

Presidenti serb e ka njohur kryeministrin Mitsotakis edhe me situatën e krijuar midis Beogradit dhe Prishtinës pas vendimit të Kosovës për të caktuar një taksë 100% për produktet serbe.

Sipas Presidencës serbe ,kryeministri Mitsotakis ka theksuar se mbështet dialogun Prishtinë-Beograd, por vendi i tij nuk do të ndryshojë qëndrim sa i përket pavarësisë së Kosovës.

Greqia është një prej pesë shteteve të Bashkimit Evropian që nuk e ka njohur ende Kosovën. Rumania, Spanja, Qipro dhe Sllovakia janë katër shtetet e tjera që mbajnë të njejtin qëndrim.

TAG:
• vucic
• sllovakia
• Spanja
• pavaresia e kosoves
• qipro
• Rumania
• kryeministri grek Mitsotakis
• taksë 100% për produktet serbe