Operacion antidrogë në Tropojë tre
të rinj kapen për kultivim kanabisi

Finalizohet me sukses operacioni antidrogë i koduar “Diga” nga specialistët e narkotikëve të Tropojës, të cilët kanë vënë në pranga tre të rinj dhe kanë asgjësuar 870 rrënjë bimë narotike si dhe është sekuestruar 1kg e 820 gram kanabis.

Në bazë të informacioneve të marra në rrugë operative, u bë i mundur arrestimi i  Marash Ramaj, 52 vjeç, banues në fshatin Raje, Tropojë, Mikel Ramaj, 23 vjeç, banues në fshatin Raje, Tropojë, Elvis Ramaj, 25 vjeç, banues në fshatin Fierz, Tropojë.

Si rezultat i kontrollit të ushtruar në banesën e  Marash Ramaj dhe Mikel Ramaj, në fshatin Rajë, Tropojë, në ambientet e brendshme të banesës janë gjetur një sasi prej 715 gram bimë narkotike në formën e boçes, si dhe në vijim të kontrollit në afërsi të banesë, në arrat në pronësi të tyre, janë gjetur dhe asgjësuar me anë të djegies 800 rrënjë bimë narkotike të kultivuara në qese plastike.

Gjithashtu gjatë kontrollit të ushtruar në banesën e  Elvis Ramaj, në ambientet e brendshme, ju gjetën dhe sekuestruan 1kg e 105 gram bimë narkotike në formën e boçes, ndërsa në kontrollin e ushtruar përreth banesës së këtij të fundit u gjetën dhe asgjësuan me anë të diegjes 70 rrënjë bimë narkotike.

Materialet i kaluan Prokurorisë së Rrethit Tropojë, për veprat penale “Prodhim dhe shitje të lëndëve narkotike” si dhe “Kultivimi i bimëve narkotike”, parashikuar nga nenet 283 dhe 284 i K.Penal.







Redaksia Online
(M.Ç/shqiptarja.com)