Ministri i Brendshëm Fatmir Xhafaj ka deklaruar se mbi kompaninë 'Arbri Garden' kishte dyshime të mëparshme, ndërsa kokainën e ka zbuluar qeni antidrogë. “Në rastin konkret kishte një dyshim të ngritur mbi këtë kompani. Ishte në listën e mallrave që do të zhdoganoheshin dhe natyrisht kontrollorët e të dy subjekteve ishin të vëmendshëm, po ndiqnin me kujdes radhën e vlerësimit të kontenierëve përkatës.

Janë katër kontenierë në mos gaboj, dhe nga një kontroll paraprak që u bë, ka pasur dy kontrolle. Një kontroll që bëhet me qenin antidrogë, i cili ka konstatuar dhe ka dhënë shenjat e para, që këtu ka dyshime për sasi droge. Pastaj është kërkuar të kalojë në skaner. Është bërë një rivlerësim i dytë, është krijuar bindje e plotë ka sasi droge.

Është njoftuar Prokuroria e Krimeve të Rënda. Është caktuar prokurori i Krimeve të Rënda, i cili do të hetonte çështjen dhe kanë rënë dakord që të aplikonin dorëzimin e kontrolluar të mallit, pra për të lejuar” deklaroi ministri në Real Story. Dje në Durrës u zbuluan 613 kg kokainë e ardhur nga Kolumbia, ndërsa në pranga janë dy persona, shoferi dhe administratori i kompanisë, pronari është në kërkim.

d.b/shqiptarja.com