Opozita: Me këto mandate nuk
njohim zgjedhjet,OSBE të zgjohet

TIRANE - Opozita e majtë nuk do të njohë rezultatin e zgjedhjeve nëse nuk ndryshon ndarja e mandateve parlamentare. Pohimi erdhi nga Skënder Gjinushi, kryetar i Partisë Socialdemokrate, që në një reagim publik në emër të koalicionit të majtë të kryesuar nga Partia Socialiste, e quajti votimin në Kuvend të mandateve të vitit 2009 një tentativë të dëshpëruar manipulimi të mazhorancës.

“Opozita nuk mund të njohë asnjë rezultat, që nuk llogaritet mbi njohjen e re të mandateve. Opozitën nuk mund ta detyrojë kurrkush që të marrë në konsideratë këtë vendim banditesk të djeshëm të Kuvendit. Eshtë njëlloj sikur kjo shumicë, ky Kuvend bastard të shpallë si rezultat zgjedhor rezultatin e 2009”,-  deklaroi Gjinushi.

Gjinushi u tregua gjithashtu shumë i ashpër edhe misionin e OSBE-së në Tiranë, të cilit i kërkoi të shprehet qartasi duke treguar rolin e tij. Loja degradon kur degradon arbitri, tha Gjinushi duke iu referuar OSBE-së.

“Ne i kërkojmë edhe publikisht misionit të OSBE në Tiranë, për të kuptuar përfundimisht kush është misioni i tyre këtu, të shprehen qartazi për këto tentativa të kësaj shumice. Arbitri ka për detyrë të zbatojë rregullat e lojës dhe loja degradon kur degradon arbitri. Këtu është misioni i OSBE, që mos të fshihet më pas gishtit po të dalë hapur do e mbroj këtë sulm banditesk ndaj mandateve siç mbrojti atë të mandateve të Tiranës apo do distancohet”,- tha Gjinushi.

Duke folur në emër të opozitës së majtë, Gjinushi i quajti absurd thirrjet për kompromis në një situatë të tillë kur nuk respektohen ligjet dhe Kushtetuta.

(i.m/ad.ti/shqiptarja.com)

TAG:
• OSBE