Besimtarët ortodoksë në mbarë vendin po luten për shëndetin e Kryepeshkopit Anastas. Komuniteti Orthodhoks i Tiranës vijoi me lutje këtë të premte në Kishën e Ungjillëzimit në Tiranë për Hierarkun e tyre, Fortlumturinë e Tij Kryepiskopin Anastas, i cili po kalon prej ditësh vështirësi me shëndetin e tij.

Të pranishëm në lutje janë dhjetëra besimtarë të të gjitha moshave, si edhe të gjithë klerikët e Tiranës. Lutjet filluan në orën 21:00 të mbrëmjes dhe do vijojnë deri në orët e para të mëngjesit të nesërm.

Këtë të premte, 10 janar, ceremoni lutjesh janë mbajtur në shumë kisha Orthodhokse në mbarë vendin. Në Korçë në Katedralen "Ngjallja e Krishtit" në Korçë, u mbajt një ceremoni paraklis për shëndetin e Kryepeshkopit Anastas Janullatos 95 vjeç.

Pas ndërhyrjes kirurgjikale për gjakderdhje gastrike, kryepeshkopi ndodhet në gjendje kritike për 48 orë.