OSBE: Ligji mundëson
gjykime më të shpejta

TIRANE- OSBE mirëpriti miratimin e ligjit për gjykatat administrative nga Parlamenti. “Ligji për gjykatat administrative i miratuar nga Kuvendi pritet të fuqizojë sistemin e drejtësisë në vend, të përmirësojë aksesin e qytetarëve dhe bizneseve në drejtësi, si dhe të mundësojë veprime procedurale dhe gjykime më të shpejta”, tha Wollfarth. “Të gjitha këto janë shumë të nevojshme për zhvillimin e mëtejshëm të sistemit gjyqësor në vend”.
OSBE vlerëson se projektligji u përmirësua ndjeshëm në krahasim me vitin 2010, kur u paraqit për herë të parë në komisionin parlamentar të ligjeve. Përmirësimet ishin, në një shkallë të madhe, rezultat i konsultimeve publike me aktorët e interesuar.

“ Kjo, së bashku me një atmosferë pune konstruktike në komision, është një faktor nxitës për reforma të mëtejshme dhe për veprimtarinë e Kuvendit”, ka dekalruar Wollfarth.
Ligji i miratuar sanksionon kritere të qarta për përzgjedhjen dhe ngritjen në detyrë të gjykatësve të gjykatave administrative, në mënyrë transparente, bazuara tërësisht në meritat e tyre dhe duke u kushtuar vëmendjen e duhur kualifikimit profesional, integritetit, aftësive dhe efiçencës së tyre. Për herë të parë, ky ligj parashikon një shqyrtim të pavarur gjyqësor, i cili do të bëjë të mundur shqyrtimin nga ana e gjykatave të çdo shkeljeje të ligjit të kryer nga organet administrative, duke përfshirë këtu mungesën e kompetencave, papërshtatshmërinë procedurale dhe rastet e shpërdorimit të detyrës.
(jd/shqiptarja.com)

TAG:
• OSBE