OSBE në ndihmë të të verbërve për
të votuar në zgjedhjet e 23 qershorit

TIRANE - OSBE mbështet një trajnim për edukimin e zgjedhësve me aftësi të kufizuara për të votuar në zgjedhjet e 23 qershorit.  Kryetari i Prezencës së OSBE-së në Shqipëri, Ambasadori Eugen Wollfarth, ishte i pranishëm në hapjen e trajnimit dyditor për një grup të verbërish, të cilët do të trajnojnë, më pas, rreth dy mijë të verbër të tjerë për të votuar në zgjedhjet parlamentare.

 “Asnjë shoqëri nuk mund të pretendohet se është demokratike nëse nuk marrin pjesë të gjithë qyetarët e saj dhe kjo gjë, siç nënkuptohet, fillon me heqjen e çdo pengese ndaj votimit të lirë”- tha ambasadori Wollfarth.

Pikërisht në kuadër të këtij qëllimi është projekti, dhe ndihma ku OSBE synon të japë në Shqipëri në promovimin e të drejtave të njeriut, duke i kushtuar vëmendje të veçantë romëve, personave me aftësi të kufizuar.

SHABLLONI ME ALFABETIN BREI PER TE VERBERIT
Të verbërit do të mund të përdorin alfabetit Brei për të votuar më 23 qershor. Shablloni që do të përdoret ditën e votimit është prezantuar sot gjatë një seminari të organizuar nga OSBE.
Brenda në këtë shabllon gjendet fleta e votimit me 66 partitë e listuara. Me anë të alfabetit Brei i cili gjendet mbi këtë shabllon të verbërit do të mund të identifikojnë partinë për të cilën do të votojnë .



(Foto: Shablloni me alfabetin Brei)

Kryetarja e Komisionit Qendror të Zgjedhjeve, Lefterie Lleshi tha se jo vetëm për të verbërit por në tërësi për të gjithë personat me aftësi të kufizuara po krijohen kushtet që ata të përfshihen në votim. 
Trajnimi është pjesë e një projekti të OSBE-së për edukimin e zgjedhësve me aftësi të kufizuara, të financuar nga qeveria gjermane, i cili zbatohet në bashkëpunim të ngushtë me Komisionin Qendror të Zgjedhjeve dhe Shoqatën e të Verbërve të Shqipërisë.

 Redaksia online
(s.g/shqiptarja.com)

TAG:
• OSBE