OSBE organizon forum të nivelit të lartë për personat e zhvendosur nga Kosova

/ATSH/.- Misioni i OSBE-së në Kosovë dhe Komisioneri i Lartë i OKB-së për Refugjatët (UNHCR) do të organizojnë takime të nivelit të lartë dhe teknik për zgjidhje të qëndrueshme për personat e zhvendosur nga Kosova, të hënën dhe të martën (21-22 shtator 2015), në Budva, Mal i Zi.
Me 21 shtator, Grupi Punues Teknik do të finalizojë propozimet në fushat me prioritet për zgjidhje të qëndrueshme, siç janë të drejtat pronësore, dokumentacioni civil, menaxhimi i të dhënave dhe bashkëpunimi. Në ditën e dytë, Forumi i Nivelit të Lartë, që përbëhet nga përfaqësues të institucioneve nga Beogradi, Prishtina, Podgorica dhe Shkupi do t'i shqyrtojnë dhe më pas do t'i miratojnë propozimet, bën të ditur njoftimi dërguar nga Misioni i OSBE-së në Kosovë.
Theksohet se këto takime ndërinstitucionale për zgjidhje të qëndrueshme për personat e zhvendosur nga Kosova janë vazhdimësi e procesit të filluar në konferencën e organizuar nga OSBE në Shkup në nëntor 2014. Që atëherë, Grupi Punues Teknik për zgjidhje të qëndrueshme është takuar dy herë në Prishtinë, në korrik dhe në shtator 2015.
Fjalimet përmbyllëse do të mbahen nga kryesuesit e delegacioneve përkatëse: Shefi i Misionit të OSBE-së në Kosovë Ambasadori Jean-Claude Schlumberger, përfaqësuesi Rajonal i UNHCR-së për Evropën Juglindore Andrew Mayne, Zëvendës Kryeministri dhe Ministri i Punëve të Jashtme të Malit të Zi, Igor Luk?i?, Ministri për Komunitete dhe Kthim i Kosovës Dalibor Jevti?, Shefi i Zyrës për Kosovë në Qeverinë e Serbisë Marko ?uri?, dhe Sekretari Shtetëror në Ministrinë për Punë dhe Politikë Sociale të Maqedonisë Enver Husejin.

TAG:
• OSBE