OSBE, Zannier: Votimi një hap i
madh drejt sigurisë dhe besimit

PRISHTINE - Sekretari i përgjithshëm i Organizatës për Siguri dhe Bashkëpunim në Evropë, Lamberto Zannier, e ka mirëpritur votimin paqësor dhe të rregullt në zgjedhjet komunale në Kosovë, si një “hap të rëndësishëm drejt besimit dhe sigurisë”.
 
Këto komente ai i bëri pas mbylljes së votimeve në rundin e dytë të zgjedhjeve, që u mbajtën dje, ndërsa OSBE-ja i ka lehtësuar zgjedhjet në katër komuna veriore të Kosovës, në linjë me marrëveshjen e Brukselit, ka njoftuar OSBE-ja, me seli në Vjenë.
 
“Ky paraqet moment shumë të rëndësishëm në procesin kompleks, duke ndërtuar besim dhe duke hapur perspektiva për stabilitetin dhe për të ardhme prosperuese për popullin e këtij rajoni”, tha Zannier, dhe ka shtuar se “kjo ka dëshmuar se Marrëveshja e 19 prillit e arritur nga Beogradi e Prishtina, dhe me sukses e ndërmjetësuar nga përfaqësuesja e lartë e Bashkimit Evropian, Catherine Ashton, po fillon të japë rezultate”.
 
Mëtej, ai ka theksuar se OSBE-ja “mbetet e gatashme për tu angazhuar në mbështetje të këtij dialogu të rëndësishëm, i udhëhequr nga BE-ja dhe në implementimin e tij”.
 
Redaksia online
(ac/shqiptarja.com)

TAG:
• OSBE