TIRANË - Në mënyrë të vazhdueshme, furnizimi i familjeve dhe bizneseve me energji elektrike has në një problematikë, tashmë të pajustifikueshme: ndërprerje të shkurtra e të gjata në çdo orë, të ditës apo të natës. Sidomos kjo vihet re kur ka rreshje, por jo vetëm. Janë të shumta rastet që qytetarët të Tiranës telefonojnë në redaksinë e Shqiptarja.com dhe Report TV, duke kërkuar ndihmë për të sensibilizuar drejtuesit e Operatorit të Shpërndarjes së Energjisë Elektrike, në mënyrë që të mos kenë dëme, të paktën jo më shumë se ato, që kanë patur, nga ndërprerja pa paralajmërim e furnizimit me energji.
 
Bilancet
Është tepër e çuditshme që të vijojë një refren i tillë në jetën e shqiptarëve, ndërkohë që viti 2015 rezultoi pozitiv për Operatorin e Shpërndarjes së Energjisë Elektrike, jo vetëm në aspektin e uljes së humbjeve në rrjet, duke sjellë më shumë arkëtime, por edhe te shpenzimet për mbulimin këtyre humbjeve përmes importeve. Të paktën, kështu deklaron vetë Operatori zyrtarisht.