TIRANE - Panairi "Horeca" që do të çelet në Tiranë gjatë muajit mars të këtij viti, do të sjellë për herë të parë në tregun shqiptar risinë e standarteve ndërkombëtare në fushën e shërbimeve të hotelerisë, bareve dhe restoranteve, si trendin që rrit të ardhurat në ekonominë e vendit.
Organizatorët shprehen se, panairi është koncepruar si një aktivitet profesional përsa i përket pjesëmarrësve të përzgjedhur, jo vetëm nga tregu vendas, por edhe nga Italia, Greqia, Maqedonia, Kosova, Mal i Zi, Serbia, Bosnja, Kroacia, Sllovenia, Hungaria dhe Holanda.
Ekspozuesit do të prezantojnë produkte nga 7 makro sektoret: ushqim, pije, teknologji, higjiene, arredim, turizëm, financë. Ndërsa janë kontaktuar dhe informuar për këtë event mbi 25000 persona nga çdo hotel, restorant apo bar të qyteteve më të mëdha të Shqipërisë.
Axhenda e panairit ka parashikuar që të ketë aktivitete të ndryshme gjatë eventit, kompeticione, takime B2B dhe si konferenca. /ATSH/