Një ditë pas protestës së policëve të burgjeve në Tiranë për të kërkuar përmirësim të kushteve të Policisë së Burgjeve, Partia e Lirisë deklaroi mbështetje ndaj protestës dhe kauzës tyre.

Sekretarja e Marrëdhënieve me Publikun, Silva Caka, në një deklaratë për mediat të mërkurën akuzoi qeverinë dhe Ministrin e Drejtësisë Ulsi Manja se nuk e ka mbajtur premtimin për përmirësimin e kushteve dhe rritjen e pagave për punonjësit e burgjeve.

Caka gjatë deklaratës prezantoi një video ku ministri Manja premton rritje të pagave dhe uniforma të reja që nga data 1 korrik, ndërkohë që data është 18 gusht dhe akoma nuk ka asnjë përmirësim të kushteve për këta policë.

“Punonjësit e sektorit të burgjeve gjendën të braktisur, gjë që i ka detyruar të dalin në protestë për shkak të mashtrimeve nga qeveria dhe Ministri i Drejtësisë Ulsi Manja. Partia e Lirisë e mbështet protestën dhe shpreh indinjatën për mashtrimin e bërë. Ministri i Drejtësisë gënjen në mes të parlamentit”, u shpreh Caka.

Anëtari të Komitetit Organizator, Faik Basha, tha se Partia e Lirisë mbështet kërkesat "për këtë sektor kaq delikat e të rëndësishëm".

“Sot, me datë 18 gusht, punonjësit e policisë janë në kushte ekstreme, kryejnë 28 ditë punë e paguhen për 22. Nuk ka as rritje pagash e as uniforma.  Siguria në burgje është në rrezik. Ka një serë problemesh të tjera si mungesa e dietave, turne deri në 12 orë, mungesa e kushteve, tualeteve, uniformave, njësimi i pagave me policinë e shtetit. Kjo qeveri që paguan mijëra euro për inceneratorët, nuk paguan për djersën e punonjësve të burgjeve” u shpreh Basha.

Përfaqësues të Sindikatës së Shërbimeve Policore zhvilluan protestë të mërkurën para zyrave të delegacionit te BE-së për të kërkuar përmirësim të kushteve të trajtimit të Policisë së Burgjeve.