Pas bekimit, vizita e Papës fut
në sherr opozitën me mazhorancën

TIRANE- Shpenzimet për dekorin në vizitën historike që Papa Françesku zhvilloi në 21 shtator në Shqipëri, është bërë objekt i akuzave të ndërsjellta mes opozitës dhe mazhorancës. PD akuzoi dje qeverinë se i ka dhënë 394 milionë lekë kompanisë së vëllait të Erjon Veliaj AEG, për dekorin gjatë vizitës së Papa Franceskut në Shqipëri, ndërkohë që me anë të një reagimi zyrtar zyra e kryeministrisë i konsideroi shpifje dhe denigrim të opozitës akuzat e ngritura nga PD.

Deputeti demokrat Gert Bogdani bëri publike dokumenta të cilat sipas tij vërtetojnë dhënien e kësaj shume e cilas sipas opozitës është dhënë me urdhër të kryeministrit Rama. "Me prokurorim të drejtpërdrejtë, Edi Rama ka futur në xhepat e kompanisë EAG Communication, 394 milionë lekë, për shërbimet e ofruara gjatë vizitës së Papës. Kompania EAG edhe pse është krijuar në janar të këtij viti, dhe nuk plotëson kriteret teknike, është kontraktuar nga qeveria. Të gjithë e dinë se kush është kompania EAG dhe pse ajo u shpall fituese, dhe pse u pasurua brenda ditës.

EAG është biznesi i Erion Veliajt, për të cilën kujdeset vëllai i tij”, deklaroi në akuzën e tij Bogandi. Deputeti demokrat shkoi edhe më tej në akuzat e tij duke u shprehur se në dokumentat që opozita disponon vërtetohet mjaft qartë se firma në fjalë, ndonëse janë përpjekur ta fshijnë nga QKR, ka lënë gjurmë dhe është lehtësisht e vërtetueshme se është në pronësi të Arbër Veliajt, vëllait të ministrit të Mirëqenies Sociale dhe Rinisë. “Është Erion Veliaj, me emër tjetër dhe administrator tjetër. Ky skandal, dëshmon se Edi Rama dhe të tijtë, janë aty për të shfrytëzuar çdo mundësi, edhe vizitën e Papa Franceskut, për t’u pasuruar. Qytetarët shqiptarë ose të vobektit, sic i quan Ministri, duhet të kuptojnë mirë, se sa qesharake është kur Erion Veliaj flet për të varfërit, teksa me një firmë përvetëson 394 milionë lekë të taksapaguesve shqiptarë”, deklaroi Bogdani.

Reagimi
Akuzat e opozitës për fondet e përdorura nga qeveria për dekorin e kryeqytetit gjatë vizitës së Papa Françeskut në Tiranë për kryeministrinë s’janë gjë tjëtër veçse thashetheme të dala nga selia e tyre e SHQUP-it. Zyra e kryeministrisë e konsideroi të degjeneruar sjelljen e opozitës, ndërkohë që dha edhe versionin e saj për këtë ngjarje.“Duke ndjekur me keqardhje degjenerimin e opozitës në një klub thashethemesh prej province, informojmë opinionin publik se në çdo vendim e veprim të sajin, Qeveria e Shqipërisë, udhëhiqet nga interesi kombëtar dhe publik. Përgojimi në klubin e ish-oficerëve i organizimit botërisht të suksesshëm, për pritjen e Papa Franceskut, është një tjetër dëshmi e degjenerimit politik, moral dhe madje edhe logjik të opozitës sonë”, sqarohej në deklaratën e kryeministrisë. 


Shkrimi u botua në Shqiptarja.com (print) në 2 Nëntor 2014

Redaksia Online
(d.a/shqiptarja.com)