TIRANË- Në zyrën e Sali Berishës sa vjen dhe po futen gjithnjë e më pak ndërkombëtar. Nga SHBA ai u shpall ‘Non Grata’ për minim të demokracisë dhe korrupsion, e teksa po trumbetonte me të madhe se kjo ishte një lëvizje e Soros së bashku me Edi Ramën, edhe Britania e Madhe mori të njëjtin vendim duke e futur në listën e personave të padëshiruar.

Mirëpo në këtë betejë që duket se e ka të humbur që në nisje të saj, Sali Berisha nuk dorëzohet dhe çdo ditë përpiqet që t’ua mbush mendjen mbështetësve të tij, që ai është “lideri” ideal që do e ribashkojë Partinë Demokratike. Sot ai ka publikuar disa foto me përfaqësues të disaporës sonë në SHBA, për të treguar se ka mbështetjen e amerikanëve, prandaj çdo takim me ta kujdeset që ta “bërtasë” në rrjetet sociale.

“Takim me përfaqësues të shquar të diasporës tonë në SHBA! Të dashur miq, pata kënaqësinë e veçantë të mirëpres përfaqësuesit e shquar të diasporës tonë në SHBA, z. Paulin Mrnaçaj, President i Albanian American Advisory Council, Inc., bashkëshorten e tij, zj. Drita Vushaj dhe gazetarin e mirënjohur Beqir Sina.

Në këtë takim unë i shpreha mirënjohjen time të thellë zotit Mrnaçaj dhe miqve që e shoqëronin, për ndihmën e tyre të çmuar ndaj çështjes shqiptare, përmbysjes së diktaturës komuniste në Shqipëri, lirisë së Kosovës, dhe mbështetjen ndaj Partisë Demokratike që nga themelimi i saj deri më sot.

Në takim diskutuam gjerësisht mbi vendosjen e plotë të monizmit në Shqipëri, rrezikun e madh në të cilin ndodhet demokracia shqiptare, bashkëpunimin e PD me diasporën, dhe rolin jetik të kësaj të fundit për shpëtimin e Shqipërisë. Folëm gjithashtu për kërcënimin e madh kombëtar që paraqet për shqiptarët Ballkani i Hapur. Takimi ishte i hapur dhe miqësor”, shkruan Berisha.

Duket se pas Evi Kokalarit, këto janë 'amerikanët' më të rëndësishëm që e takojnë në zyrë.