Patozi: Nuk ka nevojë të zihemi kush e do më shumë, me krahë të lehta SPAK-ut

TIRANE-Drejtuesi i partisë Bindja Demokratike Astrit Patozi shprehet se për ngritjen e SPAK-ut do të mjaftonte një mbështetje e heshtur dhe pa kushte dhe jo zënka se kush është gëzuar më shumë, referuar deklaratave politike nga PD-LSI dhe shumica qeverisëse.

"Nuk ka nevojë fare të zihemi me njëri-tjetrin, se kush është gëzuar më shumë sot për ngritjen më në fund të SPAK-ut.

Nuk ka shumë vlerë se cili e deshi më shumë në fillim, cili e tradhtoi rrugës dhe cili i mbeti besnik deri në fund krijimit të kësaj strukture të posaçme për goditjen e korrupsionit të niveleve të larta në Shqipëri.

Sepse është njësoj si të bësh garë se kush është më i zoti për t’i shpallur dashurinë një roboti apo kompjuteri, me shpresën se ai mund të ketë ndjeshmërinë për të zgjedhur pastaj atë që e do më shumë, në varësi të shprehjeve të ndjenjës.

Në të gjitha rastet përfundimi do të ishte më keq se tek legjenda e Homerit, kur Polifemi i tha Odiseut se si shpërblim për nderin do ta hante atë të fundit, pasi të kishte mbaruar punë me gjithë të tjerët.

Ndaj edhe sot do të mjaftonte një mbështetje e heshtur, pa por…dhe sigurisht pa kushte.

Me krahë të lehta SPAK-ut"  mbyllet reagimi i Patozit.

TAG:
• spak
• astrit patozi