PD: Bogdani zgjidhet në Lisbonë
si Kryetari më i ri IYDU

Partia Demokratike, me anë të një deklarate për shtyp, ka njoftuar se Deputeti Gerti Bogdani është zgjedhur në Lisbon të Portugalisë si President i Organizatës Botërore të Forumeve Rinore të Qendrës së Djathtë (IYDU).

Mbledhja vjetore e kësaj organizate u zhvullua në Lisbonë të Portugalisë për të zgjedhur drejtuesit e rinj për periudhën 2014-2015, ku drejtuesi më i ri u zgjodh Gerti Bogdani.

“IYDU është një organizatë dhe një familje e hapur për të gjithe forumet rinore të qendrës së djathtë, të cilët promovojne vlerat e demokracise dhe lirisë në botë. Ne kemi treguar deri më sot se mund të jemi në pararojë të reagimit dhe angazhimit edhe në vendet me konfliktet më të veshtira, dhe jam i sigurt që do të vazhdojme ta bejmë këtë edhe në të ardhmen, atje ku demokracia është në rrezik dhe ku duhet të zhvillohet. Të rinjtë janë forca e vërtetë e çdo demokracie!”- deklaroi në fjalën e tij përshëndetëse, si President i sapozgjedhur, kryetari i FRD dhe njeherazi deputeti, Gerti Bogdani.

Sipas deklaratës për shtyp të Partisë Demokratike, mbi këtë ngjarje, “votëbesimi i dhënë nga kongresi i IYDU-së në zgjedhjet e zhvilluara pasqyron forcimin e partneritetit të FRPD-se me forumet simotra të spektrit të djathtë politik në rrafshin Europian dhe atë ndërkombëtar”. Gjithashtu PD, i adreson këtë sukses FRD-së si vendimtar për përfaqësimin dhe angazhimin aktiv të këtij forumi rinor në aktivitete dhe nisma europiane dhe ndërkombëtare të partive të djathta.

“Ky përfaqësim përbën një moment historik, sepse është hera e parë që Shqiperia zgjidhet në një nivel kaq të lartë drejtues në një organizatë globale. Me krenari mund të them se FRPD është tashmë plotësisht e integruar në të gjitha organizmat e partive simotra europiane dhe botërore”- deklaroi gjithashtu në Lisbonë Bogdani, pa e fshehur aspak entuziasmin e tij.

Kjo organizatë rinore që mbledh grubimet politike rinore të spektrit të djathtë nga e gjithë bota, është themeluar nga ish-Kryeministrja e Britanisë së Madhe Margaret Thatcher për “përçimin, zbatimin dhe forcimin e lirive që kemi dhe të atyre që dëshirojmë të zhvillojmë ende më shumë kudo nëpër botë”.

Redaksia Online
(e.n/Shqiptarja.com)