PD: Demokracia funksionon vetëm nëse votoni

TIRANË, 21 Qershor/ATSH/.- Partia Demokratike u bëri apel sot qytetarëve të rrisin pjesëmarrjen në votime, pasi me votën e tyre do të vendosin për të sotmen dhe të ardhmen.
Përmes një deklarate për shtyp nga selia blu, deputetja Jorida Tabaku deklaroi se, "demokracia funksionon vetëm në qoftë se ju votoni".
"Pavarësisht parregullsive të ndodhura në të gjithë vendin, të cilat janë dokumentuar nga Partia Demokratikë dhe ju garantojmë se përgjegjësit do të mbajnë përgjegjësi për çdo parregullsi, pavarësisht thyerjes së Kodit Zgjedhor nga drejtues, ministra dhe deputet të PS dhe LSI të cilët janë futur nëpër qendra votimi, këto të faktuara me foto dhe video, qytetarët po i drejtohen kutive të votimit sepse ata e dinë që vetëm duke votuar do të marrin vendime për të ardhmen e tyre", tha Tabaku.
Partia Demokratike falënderoi qytetarët të cilët kanë treguar edhe sot qytetarinë e tyre, duke mos rënë pre e provokimeve, por kanë ushtruar qetësisht dhe në mënyrë demokratike të drejtën e tyre të votës.
"Partia Demokratike, partnerët tanë, SHBA, BE, KiE, OSBE/ODHIR janë në çdo qendër votimi dhe po dokumentojnë gjithë procesin. Kur kanë mbetur pak më shumë se 5 orë nga mbyllja zyrtare e kutive të votimit Partia Demokratike përsërit edhe një herë thirrjen drejtuar zgjedhësve që t'i drejtohen kutive të votimit dhe të hedhin votën e tyre", vijoi Tabaku.
"Vota është fuqia, gjykimi, vendimi juaj dhe askush nuk mund të dalë mbi të. Mos mungoni, keni akoma rreth 5 orë në dispozicion merrni të afërmit, familjarët, miqtë tuaj dhe shkoni të votoni. Dita e votimit është dita e fuqisë sovrane të qytetarëve", tha ajo./m.m/

TAG:
• OSBE