PD: Dy agjentët që zbuluan drogën
në Rrëshen u ndëshkuan nga Rama 

Kryetari i Departamentit të Rendit dhe Sigurisë në Partinë Demokratike, Alibeaj akuzon kryeministrin Rama se mbron trafikantët e drogës.
 
Sipas Alibeajt, dy agjentët kryesorë të policisë që gjurmuan dhe bënë të mundur kapjen e drogës në Rrëshen janë ndëshkuar.
 
"Ilir Sula, shefi i sektorit të krimit të organizuar dhe trafiqeve dhe Agron Qullhaj, shefi i anti-drogës në Lezhë, në vend se të shpërbleheshin e të promovoheshin në detyrë nga Edi Rama, janë degdisur në role periferike, pa asnjë motiv" deklaron Alibeaj.
 
Pak ditë më parë në Rrëshen në një magazinë u sekuestruan mbi 4.2 ton kanabis.
 
Deklarata e PD
Ngjarje tronditëse, që dëshmojnë rreshtimin e Ramës në krah të biznesit të kanabisit kanë ndodhur pas aksionit të fundit të kapjes së sasive të mëdha me hashash në Rrëshen.
 
Të dy agjentët kryesorë të policisë që gjurmuan dhe bënë të mundur kapjen e drogës, janë ndëshkuar, janë transferuar.
 
Ilir Sula, shefi i sektorit të krimit të organizuar dhe trafiqeve dhe Agron Qullhaj, shefi i anti-drogës në Lezhë, në vend se të shpërbleheshin e të promovoheshin në detyrë nga Edi Rama, janë degdisur në role periferike, pa asnjë motiv.

Edi Rama edhe një herë qëndroi në anën e trafikantëve, dhe kundër oficerëve, burrave e grave me integritet që luftojnë drogën.
 
Këtë rrugë ai e shtroi edhe më parë, duke dërguar në krye të Policisë së Lezhës, një ushtar të konfirmuar të Shullazit, një njeri të kontestuar publikisht, të përfshirë në ngjarje kriminale, sic është Ermal Muca.

Droga, kanabizimi i vendit, lidhja e trafikantëve me qeverinë, janë një shqetësim kombëtar, i shprehur nga qytetarët, nga përfaqësuesit me në zë të opinionit publik, nga partnerët ndërkombëtar.
 
Shqiptarët, në shumicë dërrmuese kundër kësaj të keqeje, nuk mund të lejojnë që droga e trafikantët të mbrohen, të ruhen, të rriten nga kryeministri i vendit.

Eshtë koha për ti treguar vendin atyre, e për ti dhënë Shqipërisë, zhvillim e punë të ndershme, rend e siguri.
 


dy.b/shqiptarja.com