PD:Maska hipokrite i shkon Metës,
jo Kryetarit të Kuvendit të Shqipërisë

TIRANË - Kryetari i grupit parlamentar të Partisë Demokratike, Edi Paloka, bën përgjegjës kreun e parlamentit për degradimin që sipas tij Rama u ka bërë seancave plenare
Përmes një deklarate për mediat, Paloka ka reaguar pas prononcimit të Metës, duke u shprehur se ai  vuri dhe sot maskën e tij të hipokritit, duke u tallur me një çështje shumë të mprehtë,siç është përjashtimi i Sali Berishës.

Sipas kreut të grupit parlamentar të PD, Paloka në Parlamentin që drejtohet nga Ilir Meta, Edi Rama ka përdorur fjalë që skuqin dhe horrat më të paturpshëm.
Më tej Paloka shton se kjo hipokrizi sipas tij është një maskë që mund t’i shkojë Ilir Metës, por jo Kryetarit të Kuvendit, duke e bërë këtë institucion qesharak dhe të papërgjegjshëm.
 
Deklarata e plotë e kreut të Grupit Parlamentar, Edi Paloka
"Kryetari i Kuvendit, Ilir Meta vuri dhe sot maskën e tij të hipokritit, duke u tallur me një çështje shumë të mprehtë të parlamentarizmit në vend, siç është përjashtimi i Sali Berishës. 
Ilir Meta është në pozicionin që duhet të reflektojë thellë për përgjegjësitë e tij në këto kohë kur Kuvendi dhe salla e seancave plenare, janë ndotur më shumë se asnjëherë nga Kryeministri i vendit.

Nuk është një drekë ngjalash që mund të bësh gallatë, por është përgjegjësi direkte e Ilir Metës, përjashtimi i denoncuesit, i lajmësit.

Është përgjegjësi direkte e Ilir Metës rrahja e shpatullave të deputetëve dhunues, dhe ndëshkimi i deputetit të dhunuar.

Në parlamentin që drejtohet nga Ilir Meta, Kryeministri i vendit ka kërcënuar publikisht opozitën.

Në parlamentin që drejtohet nga Ilir Meta, Edi Rama ka përdorur fjalë që skuqin dhe horrat më të paturpshëm.

Në parlamentin e Ilir Metës, Kryeministri vizaton nga pas zonjat deputete."

Dhe çfarë bën Ilir Meta, qesh dhe lëshon batuta.

Kjo hipokrizi, është një maskë që mund ti shkojë Ilir Metës, por jo Kryetarit të Kuvendit të Shqipërisë, duke e bërë këtë institucion qesharak dhe të papërgjegjshëm.
 
Redaksia Online
(a.h/shqiptarja.com)