Në një deklaratë për media nga selia e PD-së, Valbona Mezini ka akuzuar OSHEE-në si përgjegjëse për të gjitha aktet e dëshpërimit apo vetëflijimit nga ana e qytetarëve, të cilët nuk kanë zgjidhje tjetër vec burgut ose vdekjes.
Sipas Mezenit duke e gjetur veten ngushtë mes shumës së kripur të borxhit dhe problemeve në dokumentacion, si shumë të tjerë edhe 56-vjecarit Llazi Nasi nga Novosela nuk mund të mendonte për nje zgjidhje më të mirë se vendimi ekstrem që i kushtoi jetën.
“Vetëvrasja që shkaktuan dje nuk është e para,- është shprehur Valbona Mezini, - Kjo politikë i mori jetën edhe të ndjerit Qamil Zela në Lushnje. Pothuajse cdo ditë raportohen akte dëshpërimi të qytetarëve përballë kësaj sjelljeje anti-humane të qeverisë dhe OSHEE, që nuk kanë sy të shohin e vesh të dëgjojnë. 56 vjecari u vetëflijua, duke lënë një akuzë të fortë e të drejtpërdrejtë për Edi Ramën dhe OSHEE-në e keqbërësve të tij.”
Deklarata e plotë e PD
Një kryefamiljar 56 vjeçar në Vlorë, Llazi Nasi, baba i tre vajzave, i ka dhënë fund jetës, pasi OSHEE e njerëzit e saj e kishin futur në një rrugë pa dalje, duke e mbifaturuar me shuma të papërballueshme për të.
Familjarët e viktimës dëshmojnë se ai ishte ankuar disa herë për faturën e padrejtë, 10 herë më të lartë se sa shënonte matësi.
Vëllai i tij duke folur në media, thotë se zyrtarët e OSHEE veç kësaj po i nxirrnin dhe pengesa të tjera me dokumentacionin.
Kryefamiljari po depersonalizohej çdo herë e më shumë, pasi nuk po gjente zgjidhje në zyrat e OSHEE, ku punonjësit i tregonin derën pa e trajtuar asnjëherë shqetësimin e tij.
Fatura e padrejtë e sjellja arrogante e cnjerëzore e OSHEE, ia doli ta kalonte këtë prind në depresion.
Dje, përpara se të kryente aktin ekstrem të vetëflijimit, 56 vjecari kishte shkuar edhe një herë, për herë të fundit në zyrat e OSHEE, por sërish nuk mori zgjidhje.
Partia Demokratike akuzon OSHEE-në dhe qeverinë për plagën e madhe sociale që po krijojnë.
Vetëvrasja që shkaktuan dje nuk është e para.
Kjo politikë i mori jetën edhe të ndjerit Qamil Zela në Lushnje.
Pothuajse cdo ditë raportohen akte dëshpërimi të qytetarëve përballë kësaj sjellje anti-humane të qeverisë dhe OSHEE, që nuk kanë sy të shohin e vesh të dëgjojnë.
Ata nuk po u lënë qytetarëve asnjë zgjidhje tjetër përpos errësirës e burgut. Dhe për fat të keq, e gjitha kjo po merr dhe jetë njerëzish.
56 vjecari u vetëflijua, duke lënë një akuzë të fortë e të drejtpërdrejtë për Edi Ramën dhe OSHEE-në e keqbërësve të tij.
Redaksia Online
(m.p/shqiptarja.com)