TIRANË - Partia Demokratike me anë të deputetit, Genc Pollo ka akuzuar sot qeverinë se është duke bërë emërime partiake në arsim. Me anë të një deklarate për median mesditën e sotme nga selia blu, Pollo tha se, dënon vendimin e qeverisë për të mos rritur pagat e mësuesve dhe shkarkimet.
 
“Partia Demokratike vlerëson rolin e pamatshëm të mësuesve, të atyre grave e burrave, zonjave e zotërinjve, të cilët me përkushtim e përunjësi, që nga koha kur është hapur shkolla e parë shqipe e deri më sot, edukojnë fëmijët tanë, i japin atyre dije dhe u mësojnë se si të bëhen  të mirë,  të denjë dhe  të aftë për veten e  shoqërinë”, tha në deklaratën e tij, deputeti demokrat.

Sipas Pollos, “Partia Demokratike gjatë qeverisjes së saj, kreu një revolucion në arsim, përmes  reformës tërësore të sistemit:  kurrikula moderne, trajnim efektiv të mesuesit, vlerësim objektiv të nxënësit e menaxhim modern të shkollës,  deri tek dyfishimi i pagës së mësuesve duke i kthyer dinjitetin  e humbur këtij profesioni të nderuar”.

“Gjithashtu, gjatë qeverisjes së saj, Partia Demokratike ndërtoi dhjetëra shkolla të reja, i informatizoi ato, nga qendrat urbane, e deri tek fshatrat e largët.  Por për arsimin dhe mësuesit ka ende për t’u bërë. Ne jemi të shqetësuar, sepse qeveria ka ngrirë pagat e mësuesve, pra Edi Rama ka vendosur që të mos e rrisë më shpërblimin financiar të  tyre”, theksoi gjatë fjalës së tij, deputeti Genc Pollo.

Sipas deputetit demokrat, “kjo është një masë shkurajuese, është një mungesë vlerësimi për punën dhe rolin e mësuesit në shoqërinë tonë”.

“Gjithashtu, shkarkimi i kundraligjshëm  i drejtorëve të shkollave e mësuesve për interesa partiake, dhe emërimi në arsim i militantëve partiake të pakualifikuar, është shërbimi më i keq që kjo qeveri po i bën arsimit dhe edukimit në vend. Ne i kërkojmë qeverisë, të tërhiqet nga këto qëndrime”, përfundoi deklaratën e tij deputeti i PD-së, Genc Pollo.
 
Redaksia online
(ac/shqiptarja.com)