PD propozon të ndalojë veprat që i shërbyen propagandës komuniste, Mevlan Shanaj: Censurë në art?! Merruni me ndonjë aventurë tjetër

Partia Demokratike përmes një projektligji ende në proces, kërkon të vendos një gurëthemel në ndërtimin e shtetit të së drejtës. Projektligji “Për ndërgjegjësimin, kujtesën kolektive, ekspozimin dhe ndëshkimin publik të regjimit totalitar”, synon të ndalojë, çdo mjet komunikimi, qoftë vepra krijuese intelektuale, që do të gjykohet sot, se në atë kohë i ka shërbyer propagandës komuniste.

Imazhe, monumente, lapidare, emërtime, vepra të muzikës, baletit, artit pamor e më gjerë, çdo gjë që do të gjykohet se ka përcjellë informacion të pavërtetë dhe në shërbim të diktaturës, është pjesë e listës. Madje, shkohet më tej, duke e lënë të hapur mundësinë për marrjen  e masave të tjera ligjore në emër të drejtësisë.

Neni 9 i këtij projektligji ndalon dhe heq nga qarkullimi çdo vepër me përmbajtje me propagandë të hartuar para ligjit, dhe nuk lejon prodhimin e mëtejshëm të tyre. Me veprat audiovizuale ndodh po njësoj, ndalohet transmetimi, përmbledhja e përdorimi i tyre.

Krijimet nuk ndalohet vetëm kur ato i shërbejnë edukimit  për krimet komuniste, mbahen në muze, ekspozohen, përdoren në kontekst ndërgjegjësues në tekstet akademike, leksione etj. Penalizmi në rast shkeljeje të këtyre kufizimeve shkon nga 100 deri në 200 mijë lekë.

Grupi i punës që ka punuar për paketën e dekomunistizimit përbëhet nga Kreu i Grupit Parlamentar të PD-së, Enkelejd Alibeaj, sekretarja e PD-së për të Përndjekurit Politikë, Jonila Godole, Drejtorja e Fondacionit për Liri dhe Demokraci pranë PD-së Enriketa Papa si dhe Këshilltari Ligjor i Grupit Parlamentar të PD-së, Marash Logu.

Për zbatimin e këtij projektligji, siç citohet në relacionin shoqërues të firmosur nga 18 deputetë, mes të cilëve edhe ish lideri i PD-së Lulëzim Basha, nuk do të krijohen organe të tjera shtetërore. Autoriteti Qendror, sipas tyre që do të merret me zbatimin e tij, do të jetë Instituti i Studimeve të Krimeve dhe Pasojave të Komunizmit, ndonëse në grupin hartues nuk ka pasur asnjë anëtar të kësaj strukture.

Vetë kineasti Mevlan Shanaj ka reaguar, duke e konsideruar të gabuar vendosjen e drejtësisë për krimet e diktaturës, duke censuruar artin e realizuar në atë kohë.

“Më thanë që Alibeaj paska propozuar në Kuvend ndalimin e filmave të para 90 ! Nëse është kështu, (siç edhe po më kërkon media të prononcohem).... si themelues i PD, ndiej trishtim të konstatoj këtë kërkesë absurde nga PD. Ju them këtyre PD- istëve, se këtë ide, mes shqiptarëve nuk e përkrahin as 3 % e popullatës... Duket që po me këtë përqindje do ndahen zgjedhjet e ardhshme nëse hidhni teza te tilla. Korrigjoni shënjestrën nëse seriozisht mendoni se duhet ndryshuar Shqipëria! Kjo mendësi është pa asnjë vlerë ndryshimi! Do të ndodhë të shtohet shikueshmëria si për çdo gjë të ndaluar! Shoqëri e çuditshme, kaq shume të dashuruar këta politikanë me censurën në Art! Koha e ka bërë shkëlqyeshëm përzgjedhjen dhe seleksionimin. Merruni me ndonjë aventurë tjetër! Populli di vetë çfarë zgjedhë, nuk mund t'i imponohet asnjë instrument politik”, shkruan regjisori në rrjetet sociale.

Vetë ky Institut (ISKPSH) në raportin që i paraqet Kuvendit lidhur me studimin dhe vlerësimin e veprimtarisë Komuniste jep rekomandime të tjera për lustracionin, duke u fokusuar tek plotësimet ligjore për dënimin e veprave penale të kryer në diktaturë, punësimin në administratë, ndalimin e promovimit të propagandës etj. Ndërsa sa i përket veprave të realizuara në atë kohë, kërkon të ndalohen veprat që glorifikojnë partinë komuniste dhe anëtarët e saj, si dhe të rregullojë mënyrën e shfaqjes të prodhimeve propagandistike të regjimit komunist.

 

Postimi i aktorit

 

 

 

 

 

(Kliko këtu për të lexuar dokumentin e plotë) Relacion i prligjit

 

 

(Kliko këtu për të lexuar dokumentin e plotë)Prligj per ndergegjesimin, kujtesen kolektive, ekspozimin dhe ndeshkimin publik te regjimit totalitar

 

Rendit zhvillimet sipas orarit:

Të Fundit Të Parat

M.Q./B.K./Shqiptarja.com

TAG:
• PD
• dekomunistizimi
• komunizmi
• Mevlan Shanaj