PD "mbron" Goxhaj: Dhuna e Edi
Ramës do shumëfishojë protestën

TIRANE - Partia Demokratike ka dënuar sot arrestimin e aktivistit të shoqërisë civile, Altin Goxhaj duke e cilësuar këtë si një shantazhim të qytetarëve shqiptarë.

Koordinatorja për mediat e PD, Grida Duma, në një deklaratë për shtyp, u shpreh se arrestimi i aktivistit, është dëshmi e rritjes së autoritarizmit të qeverisë si dhe shkelje e të drejtave të njeriut.

Sipas Dumës, ky akt si dhe përkeqësimi ekonomik që po kalon vendi, referuar rritjes së çmimit të energjisë, do të shtojë edhe më tepër protestat e qytetarëve ndaj mazhorancës.

Më poshtë deklarata e plotë për mediat e Grtida Duma:

Ndalimi sot nga policia dhe shoqërimi me forcë i aktivistit Altin Goxhaj, është shenjë e krizës së nervave që po kalon kryeministri dhe shtimit të represionit ndaj qytetarëve të vendit e fjalës së lirë.

Nga njëra anë Edi Rama rrit tarifën financiare duke ua bërë edhe më të vështirë jetën 2 milionë e 100 mijë shqiptarëve, dhe nga ana tjetër nuk lejon të protestohet ndaj vendimeve të tij.

Forca policore e ushtruar sot ndaj aktivistit është dëshmi e rritjes së autoritarizmit të qeverisë, dhe e dhunës ndaj ushtrimit të të drejtave themelore në një demokracisë, sic është ajo e fjalës së lirë dhe e organizimit.

Por z.Rama i ka bërë llogaritë gabim. Forca e përdorur prej tij vetëm do ta shumëfishojë protestën. Qytetarët po ngrihen dhe nuk do ta lejojnë të keqen.

Ka një mënyrë për të ndalur protestën. Ajo është kur qeveriset mirë, kur zbatohet ligji për të gjithë njësoj, kur merren masa për të rritur ekonominë.

Qytetarët protestojnë kur Edi Rama rrit arbitrarisht cmimin e energjisë. Qytetarët protestojnë kur Edi Rama rrit cmimin e naftës, kur rrit taksat. Qytetarët protestojnë kur Edi Rama prish ndërtimet e të pamundurve dhe lejon ndërtimet e miqve.

Protestë do të ketë kur në vend pllakos papunësia, varfëria mjerimi. Dhe protesta nuk ndalet dot nga Edi Rama dhe represioni i tij. Qytetarët po ngrihen dhe Partia Demokratike është në krah të tyre.

Redaksia Online
(e.c/shqiptarja.com)