“Seanca e 31 korrikut e Kuvendit të Shqipërisë e mbylli me turp vitin e parë të kësaj mazhorance të inkriminuar. Si të mos mjaftonin ligjet për kapjen politike të drejtësisë, krijimin e një prokurorie paralele nëpërmjet Byrosë Kombëtare të Hetimit dhe firmosjes së çekut të bardhë për CEZ duke vjedhur 1,1 milion lekë nga xhepi i çdo shqiptari, kjo mazhorancë votoi me urdhër për të rrëzuar amendamentet e opozitës për ligjin e amnistisë. Të gjithë shqiptarët e kujtojnë se si Rama dhe Meta, këta blerës të votës së shqiptarëve me para të korrupsionit politik dhe krimit të organizuar, amnistuan dhe ndërprenë hetimin e blerjes së votave në Korçë. Ky turp që shqiptarët e panë me zë dhe me figurë, përbën krim sipas ligjeve të Republikës. Por Rama dhe Meta kanë votat në parlament dhe i amnistuan nga ndjekja penale militantët që veçse zbatonin porosinë e tyre. Duke shkelur çdo procedurë parlamentare, Rama dhe Meta e mbajtën peng dhe për disa muaj amendamentin e opozitës dhe qëllimisht vendosën që ta rrëzojnë amendamentin e opozitë në seancën e fundit. Ata e futën votimin dhe rrëzimin e amendamenteve të opozitës në mes të listës së gjatë të ligjeve me shumicë të cilësuar, vetëm e vetëm që t'ia fshihnin opinionit publik ketë amnisti të dytë. Kjo amnisti e dytë e krimit të blerjes së votës, e votuar me 82 vota të kësaj mazhorance, është provë e simbiozës dhe lidhjes së fortë të Ramës dhe Metës me krimin. Ata janë të gatshëm të amnistojnë çdo kriminel që i shërben kapjes dhe mbajtjes prej tyre të pushtetit.”- tha Bylykbashi për mediat.
Gjithashtu Deputeti Bylykbashi hodhi pretendimin se kriminelët janë emëruar në poste drejtuese dhe se amnistimi i blerjes së votës në Korçë i thotë shqiptarëve se askush që blen apo vjedh vota nuk do të dënohet. Gjithashtu, duke vënë në të njëjtën prizëm Kryeministrin Rama dhe Kryetarin e Parlamentit Meta, ai i konsideron ata si “një dyshe oligarkike”.
“Kjo amnisti është provë tjetër e paktit me krimin që ka bërë dyshja oligarke që qeveris vendin. Është provë që shpjegon paktin më të cilin kjo dyshe i hapi krimit portat e parlamentit. Kjo amnisti i shpjegon shqiptarëve arsyet pse kriminelët janë emëruar në poste drejtuese në administratë sapo kjo dyshe oligarkësh mori pushtetin. Amnistimi i blerjes së votës në Korçë i thotë shqiptarëve se askush që blen apo vjedh vota nuk do të dënohet. Opozita denoncon me forcë këtë skandal. Ky nuk është thjesht skandali i radhës i kësaj mazhorance. Blerja e votës është vetëm simptomë e korrupsionit politik të oligarkisë që po instalohet në Shqipëri. Korrupsioni politik qëndron në themel të çdo forme korrupsioni të qeveritarëve dhe i hap derën krimit. Opozita dhe shqiptarët nuk do ta lejojnë këtë të keqe të anullojë votën e lirë të shqiptarëve!”- përfundon deklaratën për shtyp Deputeti Bylykbashi.
Redaksia Online
(e.n/shqiptarja.com)