Sipas Idrizit mbështetja për forcë politike që ai kryeson është rritur ndjeshëm e për këtë arsye ai u shpreh i bindur në dyfishimin e mandateve të PDIU në zgjedhjet parlamentare të 2017.
“Ne kemi nisur fushatën e anëtarsimeve të reja në PDIU. Sigurisht që po më këtë lloj kënaqësie dhe surpërize kam parë edhe anëtasimet e reja “online”. E gjithë kjo mbështetje e madhe na tregon shumë, na tregon se si e nisëm, na tregon se ku jemi, por na tregon edhe përgjegjësinë që kemi për ta bërë PDIU-n një parti të madhe, e cila sot është e strukturuar në të gjithë Shqipërinë. Gjithë procesi I anëtarsimeve do të kulmojë në zgjedhjet e 21 majit ku nga kryetari I partisë deri tek delegatët në kongres do zgjidhen me parimin një anëtarë një votë," tha Idrizi.
Por kreu i PDIU foli hapur për rezervat e tij për kodin elektoral, i cili sipas tij është një sistem Stalinist sipas të cilit populli voton dhe vetëm dy parti numërojnë votat për interesat e tyre.
Idrizi kujtoi që ky ngërç u shfaq edhe në administrimin e procesit te elektoral në zgjedhjet lokale të 2015.
Deputetja e PDIU-së, Mesila Doda tha se PDIU është një parti patriotike. “Nuk ka Shqipëri të madhe ose të vogël, ka një Shqipëri aty ku e ka vendosur zoti, së bashku në një shtet përtej, që na ka ndarë artificialisht. Ne nuk jemi as ekstremist, as nacionalist por jemi patriot. E vetmja mundësi zhvillimi për shqiptarët është të jemi bashkë. Nëse jemi veçmas jemi të dobët. Politikanët e të dyja anëve të mos sillen në mënyrë meskine, duke minuar përpjekjet e atdheut.” – tha Doda.
PDIU ka nisur fushatën e anëtarësimeve të reja në të gjithë vendin, ndërsa pritet që në mbyllje të kësaj fushate, në fillim të muajit qershor të mblidhet kongresi i partisë.
Redaksia Online
(F.T/shqiptarja.com)