Rama tregon si do të nisë verifikimi i kriminelëve nga SPAK-u: Për 30 ditë lamtumirë pasuri (VIDEO)

E ndërsa nesër do të fillojë zbatimi i ligjit special kundër kriminelëve, kryeministri Rama ka dhënë edhe detajet si do të nisë punë. Ai tha se personave që janë identifikuar nga policia me pasuri të dyshimtë do u dërgohet një formular që duhet ta plotësojnë brenda 48 orëve si e justifikojnë pasurinë, që më pas i dërgohet SPAK-ut, që duhet të shprehet për 15 ditë dhe po kaq gjykata dhe më pas lamtumirë pasuri. Pra brenda një muaji mbyllet procesi për të dhënë një vendim në lidhje me një pasuri të dyshimtë. 

"Nga nesër një letër do u drejtohet këtyre subjekteve dhe brenda 48 orëve do u kërkohet të plotësojnë kërkesat e formularit për burimin e pasurisë së tyre dhe pastaj formulari do të shkojë te SPAK-u dhe nga SPAK- u në gjykatë dhe ata do të duhet të vijnë para gjykatësit dhe të tregojnë sa fort kanë punuar tokën dhe sa shumë ullinj dhe portokalle kanë mbledhur, sa shumë vite kanë bërë roje natën në objekte, sa shumë janë lodhur dhe stërmundur në fasoneri, sa shumë kanë kursyer nga puna e tyre e stërndershme brenda apo jashtë vendit, nëse duan ti mbajnë ato pasuri, për ndryshe gjithcka që kanë sot, nesër do të jetë pronë e shtetit dhe në radhë të parë e policisë së shtetit. Kjo nuk do të vijojë si ato proceset ku në fund persona me burgim të përjetshëm dalin për të punuar në komunitet, por kjo ka afate. 48 orë formulari, deri në 15 ditë SPAK, deri në 15 ditë gjykata dhe pastaj lamtumirë prona e juaj, jo e imja, por e të gjithëve që e gëzojnë ata" deklaroi ai.

Lajmi kryesor:

Nesër nis anti-KÇK-ja, Rama: Për 30 ditë, kriminelët i thonë lamtumirë pasurisë! Për 3 ditë pezullohen gjyqtarët e korruptuar

/b.ha./Shqiptarja.com

TAG:
• edi rama
• ardi veliu
• Renea
• Sander Lleshaj
• anti kck
• Operacioni Forca e Ligjit
• ofl