Për armët e Sirisë duhen vlera të larta morale

 Të ishim të saktë si gjermanët, të ishim seriozë e të drejtë si norvegjezët, të ishim elegantë e të kishim sensin e masës si francezët, të ishim punëtorë si amerikanët, të ishim gjenialë e teknologjikë si japonezët, ndoshta mbarë komuniteti ndërkombëtar, gjithë vendet e NATO-s, Shtetet e Bashkuara të Amerikës, do të bënin mirë të na besonin detyrën tepër delikate të asgjësimit të armëve të Sirisë. 

Por ne nuk i kemi këto virtyte. E njohim mirë veten. Ne jemi njerëzit që bëmë Gërdecin e nderojmë jo viktimat e asaj tragjedie, por autorët që sot rrinë në shtëpi komode, makina luksoze e poste prestigjoze politike. Jemi vendi që kemi ende mbi 80 ton armë kimike të kohës së diktaturës së Enver Hoxhës. Jemi njerëzit që hedhim plehrat e përditshme nga dritaret e shtëpisë, që hedhim ndotjet industriale në lumejtë dhe liqenet e vendit. Ne, jemi njerëzit që lejojmë industritë metalurgjike të huaja të pasurohen duke mos venë filtra të detyrueshëm në një vend civil dhe u kemi vënë atyre në dispozicion si filtra, mushkëritë e gjithë banorëve të zonës së Elbasanit.

Pastaj, ne jemi njerëz që nuk protestojmë, ose protestojmë fare pak. Nënshtrohemi dhe preferojmë të pasurin, të fortin, të pushtetshmin. 

Të gjitha këto nuk shkojnë. Në një mjedis të tillë do të vijnë mijëra tonelatat e armëve kimike të Sirisë?
Dhe dy fjalë për Qeverinë dhe për kryeministrin Edi Rama: Janë të freskëta Kuvendimet e fushatës elektorale, ato në formë rrethi, ku flisnin e dëgjonin të gjithë. Eshtë me vlerë dhe konferenca e antikorrupsionit që po mbahet gjatë sot në kryeqytet. Korrupsioni është një infeksion që duhet luftuar nga të gjithë. Por mbërritja apo jo e armëve kimike siriane në Shqipëri, kërkon të njëjtin kuvendim. Duhet bërë me të gjithë grupet e interesit. Urgjentisht.