Përgjimet nga policia, 7 garancitë ligjore që mbrojnë të drejtat dhe alarmi i rremë i opozitës  

Përgjimet nga policia, 7 garancitë ligjore që mbrojnë të drejtat dhe alarmi i rremë i opozitës  

TIRANE- Partia Demokratike ka dhënë alarmin se ndryshimet e propozuara në ligjin për Policinë e Shtetit, në kuadër të aksionit kombëtar anti-krim, vendosin regjimin policor, shkelin Kushtetutën dhe të drejtat e njeriut.

Po si qëndron e vërteta e ndryshimeve në ligjin për Policinë e Shtetit?

Ndryshimet parashikojnë të drejtën e policisë, për të marrë dy masa të veçanta, pa lejen e prokurorit, gjatë një veprimtaria informative-gjurmuese ose një procedimi policor, me qëllim parandalimin dhe zbulimin e veprave penale të autorëve të tyre. Dy masat janë përgjime dhe mbikëqyrje të fshehtë të personave të dyshuar për kryerjen e veprimtarive kriminale. Për të garantuar ligjshmërinë e kësaj veprimtaria nga policia janë parashikuar disa garanci, pikërisht për të evituar veprimet abuzive, shkeljen e të drejtave të njeriut dhe devijimin nga kornizat ligjore. 

-Së pari, strukturat e policisë do të përgjojnë dhe survejojnë, pa vendim të prokurorit, vetëm personat e dyshuar për kryerjen e veprimtarie kriminale. Pra objekt i ligjit janë vetëm njerëzit e krimit apo të dyshuar si njerëz të krimit. 

-Së dyti, vënia e një personi nën përgjim apo nën mbikëqyrje të fshehtë nga strukturat policore, do të bëhet me vendim të miratuar nga titullarët e strukturave të policisë, në nivel drejtorie qendrore e vendore. 
 
-Së treti, afati i përdorimit të këtyre masave të veçanta është i kufizuar. Një person mund të vihet nën përgjim jo më shumë se tre muaj. Kur këto masa përdoren për  me qëllim parandalimin dhe zbulimin e krimit të organizuar apo të krimeve të rënda, afati i përdorimit mund të zgjatet vetëm një herë me tre muaj të tjerë, gjithnjë me vendim të drejtuesve të policisë. 

-Së katërti, rregullat dhe procedurat për përdorimin e këtyre masave të veçanta nga policia do të përcaktohen në një udhëzim të përbashkët të Ministrit të Brendshëm, kreut të SPAK-ut dhe kryeprokurorit. 

-Së pesti, ministri i Brendshëm, kreu i SPAK-ut dhe kryeprokurori mund të kontrollojnë, në çdo kohë, zbatimin e rregullave dhe të procedurave të parashikuara në udhëzimin e përbashkët. 

-Së gjashti, të gjitha provat e mbledhura nga policia gjatë përdorimit të masave të veçanta, do t’i referohet prokurorisë. 

-Së shtati, të gjitha provat e mbledhura gjatë përdorimit të masave të veçanta që policia ia referon prokurorisë, do të vlerësohen nga gjykata. Kjo e fundit do të vlerësojë nëse procedura e mbledhjes së këtyre provave është apo jo e ligjshme. Pra, kjo veprimtari do të kontrollohet nga kreu i SPAK, kryeprokurori, prokurorët e çështjeve dhe gjykatësit.

Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

  • Sondazhi i ditës:

    Si do jenë ndryshimet në Kodin Zgjedhor që do bëjnë PS-Rithemelimi?



×

Lajmi i fundit

Një shesh në Tiranë do të mbajë emrin e Dr. Florit, ja ku ndodhet

Një shesh në Tiranë do të mbajë emrin e Dr. Florit, ja ku ndodhet