Kryesia e PD ka vendosur të miratojë sot me votë unanime vendimin e KOKOE në PD për të lënë kandidat në zgjedhjet e 23 majit vetëm Sali Berishën. Votë unanime për vendimmarrjen e saj edhe mbi përjashtimin e anëtarëve të tjerë, mes të cilëve për Ervin Salianjin, me argumentin se nuk është anëtar i PD.

Nga gara largohen përfundimisht edhe 4 kandidatët e tjerë, Evi Kokalari, Alesia Balliu, Vladimir Mulaj e Mereme Sela, më këtë të fundit që çështjen e ka çuar në gjykatën e Tiranës.

Por, të qenit i vetëm në garën, për Sali Berishën nuk është tregues i një partie të mbyllur. Sipas tij qëndron e kundërta, se PD është një parti që mbetet e hapur ndaj garës. Në mbledhjen e Kryesisë, Berisha deklaroi edhe njëherë se PD është ndër të paktat parti në Europë dhe në botë që e zgjedh kryetarin me votë nga anëtarësia.

“PD ka qenë dhe mbetet parti e hapur ndaj garës më eprore. Partitë që zgjedhin kryetarë me një anëtar një votë nuk janë shumicë, por janë pakicë. Janë një pakicë që po rritet. Kemi instaluar me kohë, jemi dhe do mbetemi parti e garës së lirë, ndershme, por themelore partia e anëtarëve të saj.

Të qëndrosh parti e anëtarëve të saj, do të thotë t’iu japësh të drejtë atyre të shprehen dhe do të thotë të votohen ato që mbrojnë interesat dhe jo t’ua caktojë kandidatët dikush tjetër. Kjo nuk mund të ndodhë”, tha Berisha.

Berisha pretendon se kurrë nuk ka diktuar kandidatë formalë për tu përballur me të, ndërsa për përjashtimet thotë se nuk plotësuan kriteret e caktuara nga PD. Në mbledhjen e Kryesisë, ai tha se PD do jetë parti e anëtareve të saj dhe se kurrë s’do të pranojë në garë kandidatë të rremë.

“Kurrë dhe kurrë në jetën time, nuk kam tentuar dhe s’do tentoj të krijoj kandidaturë. Nga Berisha mos e prisni kurrë, në mënyrë absolute deri sot nuk i kam thënë njeriu të kandidojë. Si kam thënë kurrë Bashës të kandidojë, Olldashit, kurrë si kam kërkuar Uran Butkës të kandidojë me mua, kurrë Ibsen Elezit. Refuzoj në mënyrën më kategorike praktikën që të përpiqem të zgjedh rivalin.

Në përzgjedhjen e kandidatëve ka kritere, madje ka forca politike që kanë kritere të forta. Ne s’i kemi të forta. Kemi kritere ato që janë përcaktuar. PD ka qenë, është dhe do jetë parti e garës, parti e anëtarëve të saj, e votës së tyre. Por s’do jetë kurrë parti e kandidaturave kallpe. Kurrë si kam thënë Elezit për rival, ka kandiduar vetë”, vijoi Berisha.

Kreu i PD la porosi për ngritjen e grupit të punës për përgatitjen e Kuvendit Kombëtar më 30 maj, duke thënë se data u zhvendos pasi nuk kishin gjetur sallë.

Rendit zhvillimet sipas orarit:
Ora 15:31
Mereme Sela çoi garën për kreun e PD në Gjykatë, Kaso: Duhet t’i ishte drejtuar fillimisht gjykatës së partisë, e përcakton statuti

Deputeti demokrat Ivi Kaso sqaroi pasi mbledhjes së Kryesisë së PD se u miratua vendimi i KOKOE për konfirmimin vetëm të Sali Berishës në garën e 23 majit. I pyetur nga gazetarët mbi rastin e Mereme Selës, e cila e ka çuar çështjen edhe në Gjykatën e Tiranës, Kaso tha se Sela plotësonte vetëm kriterin e anëtarësisë dhe jo atë që kandidati duhet të ishte një figurë me eksperiencë të paktën 10 vite në strukturat drejtuese në PD.

Sipas Kasos, sela fillimisht duhet të ankohej në Kolegjin e Apelimit në PD dhe më pas t’i drejtohej Gjykatës, siç e parashikon statuti i partisë.

“Nuk është pranuar për të kandiduar, ju referojeni vendimmarrjes e cila nuk e ka kualifikuar. Unë besoj që vendimi i KOKOE-s është i qartë dhe i arsyetuar.  Ndalet në rastin e zonjës Sela, e cila siç KOKOE e ka vërejtur dhe ka shqyrtuar, plotëson vetëm një kriter nga ato të përcaktuara në vendimmarrjen e datës 18.03, pra vetëm kriterin e anëtarësisë.

As nga pikëpamja formale dokumentacioni i zonjës Sela nuk ishte i plotë, pasi i mungonte dhe kriteri tjetër thelbësor, pra paraqitja e formularit të dekriminalizimit, të cilin zonja nuk e ka paraqitur pranë Partisë Demokratike, por tutje asaj, për shkak se nuk plotësonte kriterin themelor, atë të një figure me eksperiencë drejtuese 10, të paktën 10 vjeçare në strukturat e larta drejtuese të Partisë Demokratike, automatikisht ka pasjellë skualifikimin e kësaj zonje.

Sigurisht statuti parashikon edhe mënyrat në të cilat ankohet ndaj kësaj vendimmarrje kushdo i interesuar që është bërë pjesë e garës, dhe sigurisht ankimimi i drejtpërsëdrejti në gjykatë, në qoftë se është kjo që ka ndodhur, nuk është rruga e duhur statutore, pasi statuti parashikon që në këto raste ankimimi i drejtohet së pari gjykatës së partisë dhe mbas ezaurimit të kësaj rruge administrative, eventualisht çështja mund të bëhet objekt shqyrtimi edhe gjyqësor.

Por besoj që në këtë rast jo vetëm statuti, por edhe kriteret e vendosura dhe transparenca që ka bërë KOKOE në vendimmarrjen e saj përsa i përket kësaj zonje, lë pak vend për diskutim”, tha Kaso.

SI.E./Shqiptarja.com

Ora 15:07
Kryesia vendos/ Berisha i vetmi kandidat në zgjedhjet për kreun e PD, vulos lënien jashtë gare të Salianjit

1777659082_seliaepd.jpg

Kryesia e PD ka vendosur të miratojë sot me votë unanime vendimin e KOKOE në PD për të lënë kandidat në zgjedhjet e 23 majit vetëm Sali Berishën.

Votë unanime për vendimmarrjen e saj edhe mbi përjashtimin e anëtarëve të tjerë, mes të cilëve për Ervin Salianjin, me argumentin se nuk është anëtar i PD.

"Përsa i përket kandidaturës së ish-deputetit Salianji, i cili ishte një nga kandidaturat të cilat mediatikisht është promovuar si kandidaturë ose aplikim i vlefshëm në garën për kryetar të Partisë Demokratike, KOKOE-ja vlerësoi se ky kandidat nuk plotëson kushtin thelbësor, atë të qenies anëtar i Partisë Demokratike, pasi me veprimet e tija dhe me aktet e veta politike, është në shkelje të Kodit të Etikës së Partisë Demokratike, nenit 10 të tij, si dhe të nenit 24 të statutit të Partisë Demokratike, përsa i përket lidhjeve të papërshtatshme me eksponentë të krimit të organizuar, çka e bëjnë automatikisht jo anëtar të Partisë Demokratike", tha Ivi Kaso. 

Vendimi i Kryesisë u bë me dije pas mbledhjes nga deputeti Ivi Kaso, i cili tha se Berisha ishte e vetmja kandidaturë që plotësonte 3 kriteret e vendosura nga PD për të qenë pjesë e garës.

“Komisioni njëzëri vlerësoi se zoti Berisha i plotësonte të treja këto kritere, ndërkohë që dy kandidatët e tjerë, pavarësisht se plotësonin kushtin e të qenit anëtarë të Partisë Demokratike, si zonja Sela dhe zoti Mulaj, nuk plotësonin kriteret e tjera përsa i përket eksperiencës së tyre drejtuese në strukturat qendrore dhe vendore të Partisë Demokratike për një periudhë 10-vjeçare, dhe për këtë arsye u konsideruan të papërshtatshme nga KOKOE-ja dhe u konsideruan gjithashtu të papërshtatshme dhe nga kryesia e Partisë Demokratike për të garuar.

Sikundër, kryesia u njoh me arsyetimin e KOKOE-s përsa i përket disa kërkesave të tjera të paraqitura, të cilat nëpër deklarata të tjera publike nga individë të ndryshëm janë konsideruar si aplikime të vlefshme për garën për kryetar të Partisë Demokratike.

Këto kërkesa, në radhë të parë, KOKOE-ja vlerësoi dhe kryesia e Partisë Demokratike njëzëri miratoi këtë vlerësim të KOKOE-s, se janë paraqitur nga persona të cilët nuk plotësojnë kushtin themelor, atë të anëtarësisë së Partisë Demokratike, i cili sipas nenit 10 dhe sipas nenit 19 të statutit të Partisë Demokratike, është rekuziti thelbësor për hyrjen në garën për kryetar të Partisë Demokratike”, tha Kaso.

SI.E./Shqiptarja.com