Rrugëtimi i autorëve të huaj anembanë botës drejt edicionit të II të Festivalit të Fotografisë dhe Festivalit, u përmbyll sonte me plot çmime të dhëna në Amfiteatrin e Tiranës. Poshtë yjeve dhe rrethuar nga entuziazmi dhe energjia e mirë, plot 22 nga 50 producentë pjesëmarrës u shpërblyen për punën e tyre kreative. 6 fotografë, për syrin e tyre të mprehtë dhe detajist.
Ishte juria me profesionistë të fushave të ndryshme, ata që i mirëpritën këta turistë të etur jo vetëm për art, por edhe për histori e kulturë. Çmimi për "Fotografinë më të mirë" shkoi për Michael Stoeger me "Wintery Skies".
"Faleminderit shumë! Kjo nuk ndodh çdo ditë! Jam i lumtur që jam ketu dhe i prekur shumë për këtë çmim. Për këtë foto do thoja është realizuar në Jug të Australisë. Shtëpia jonë e vërtetë, është Universi. E di këtë që fëmijë, ndonëse kur rritesh shpesh e harron këtë gjë", - u shpreh Michael Stoeger.
Çmimi për "Filmin më të Mirë", shkoi për Julien Guéraud me "Quest for Silence"; film ky për zhurmat e jetës dhe betejat me to.
"Ky është çmim shumë i rëndësishëm për mua, sepse nuk do e mendoja kurrë përpara pesë vitesh, ndërsa punoja në dhomën time të vogël, se do ta fitoja. Jam shumë i lumtur që ndodhem këtu në këtë vend të bukur si Shqipëria, me njerëz të mrekullueshëm", - u shpreh Julien.
Çmimi nga vetë organizatorët e Travel Fest Festival, iu dha Mikael Kyster për dokumentarin e shkurtër e komik "The Kyster Family in Albania". Në këtë festival, nuk munguan videocall-et nga autorët e mos pranishëm dhe një prej tyre ishte edhe ajo e Mikaelit. Ai i mëshoi me përshëndetjen e tij, të njëjtës shprehi të veçuar nga produksioni i tij, se "Çmimi i vërtetë nuk është një trofe, por njerëzit që gjithkush takon rrugës", duke iu referuar kështu eksperiencës së kaluar në Travel Fest Albania.
Ndërsa përshtypjet për bukurinë dhe vlerat e Shqipërisë, veçse artikuloheshin nga një çmim në tjetër, nga një autor në tjetër, pati edhe lëvdata nga pjesëtarët e jurisë; të gjithë u bënë bashkë jo vetëm për organizimin në përmasa të mëdha, por mbi të gjitha për cilësinë e origjinalitetin e filmave konkurrues.
"Jam befasuar! Kam parë disa dokumentarë shumë interesantë për nga ndërtimi, struktura dhe filozofi shumë të thjeshta. Kam parë shumë pak fryrje, modele tipike...", - u shpreh Ermal Hasimja, ndërsa shtoi në nota humori: "E sigurt, vitin tjetër do të jem edhe unë konkurrues".
Çmimi për kategorinë "Mjedisi dhe Ekologjia" shkoi për regjisorin Karsten de Vreugd me "Paved Paradise".
"Një falenderim i veçantë shkon për vullnetarët e këtij festivali, që kanë punuar fort për realizimin, si dhe njerëzit pas kamerave. Pa ta, nuk jemi asgjë", - tha de Vreugd.
Prej datës 3 deri më 7 Korrik, 112 filma janë transmetuar në Tiranë, Durrës e Gjirokastër. 112 filma bënë të mundur të zgjonin shqisat e një audience të gjerë. Edicioni i II ishte padyshim rendës i edicionit të I për nga suksesi.
Lajme të tjera
-
Travel Fest nis në Amfiteatër! Regjisorët e huaj: Një përvojë e jashtëzakonshme! Shqipëria, një thesar i fshehtë për tu zbuluar! Në 5 ditë 112 filma
4 Korrik 2023, 15:45 -
Kinema e turizëm! Travel Fest Albania, 5 ditë në Tiranë, Durrës e Gjirokastër! 112 filma e mbi 50 autorë, Çeço: Shqipëria, si burim frymëzimi për të tjerë filma
1 Korrik 2023, 14:30 -
Travel Fest Albania merr certifikatën EFFE, renditet ndër festivalet më të mira në Europë
2 Dhjetor 2022, 12:14
