E ardhmja e Gianni Infantinos në krye të FIFA-s është vënë në diskutim pas polemikave të fundit që përfshinë organin më të lartë të futbollit botëror. Debati u ndez pas një propozimi, tashmë të tërhequr, për shitjen e aksioneve te privati të pakicës në një entitet të ri komercial të lidhur me Kupën e Botës dhe kompeticionet e tjera të FIFA-s.

Infantino e kishte prezantuar projektin si një mënyrë për të rritur të ardhurat dhe për të financuar zhvillimin e futbollit në nivel global. Megjithatë, nisma hasi në kundërshtime të forta nga institucionet më të rëndësishme të futbollit. UEFA e kritikoi publikisht planin, ndërsa edhe CONCACAF dhe konfederata të tjera shprehën shqetësime për mungesën e transparencës dhe mënyrën e qeverisjes.

Pas presionit të madh, FIFA vendosi ta tërhiqte projektin, duke shtuar zërat se pozicioni i Infantinos mund të vihet në diskutim përpara zgjedhjeve të ardhshme presidenciale. Edhe pse nuk ka ende kandidatura zyrtare, në qarqet e futbollit po qarkullojnë pesë emra si pasues të mundshëm të presidentit aktual.

Arsene Wenger

Aktualisht drejtor për zhvillimin global të futbollit në FIFA, ish-trajneri legjendar i Arsenalit gëzon respekt të madh ndërkombëtar. Përvoja e tij në futboll është e padiskutueshme, por sfida kryesore mbetet sigurimi i mbështetjes politike nga konfederatat.

Nasser Al-Khelaifi

Presidenti i Paris Saint Germain dhe një nga figurat më me ndikim në futbollin evropian përmendet gjithashtu si kandidat potencial. Megjithatë, lidhjet e tij me një klub elitar mund të hapin debat për konflikt interesi.

Salman bin Ibrahim Al Khalifa

Presidenti i Konfederatës Aziatike të Futbollit është një emër i njohur në politikën e futbollit botëror. Ai kandidoi edhe në zgjedhjet e vitit 2016 kundër Infantinos dhe mbështetja e federatave aziatike mund ta bëjë sërish një kandidat të fortë.

Victor Montagliani

Presidenti i CONCACAF konsiderohet një figurë me ndikim të madh në prapaskenë. Përvoja në drejtimin e konfederatës dhe marrëdhëniet e mira brenda strukturave të FIFA-s e vendosin atë mes emrave seriozë për postin më të lartë.

Aleksander Ceferin

Sipas shumë analistëve dhe medieve sportive, presidenti i UEFA-s mbetet kandidati më i fortë. Autoriteti i tij në futbollin evropian, përvoja në drejtimin e UEFA-s dhe raportet shpesh të tensionuara me Infantinon e bëjnë emrin që përmendet më shpesh si pasues i mundshëm në krye të FIFA-s.

Për momentin, Gianni Infantino vazhdon të mbajë postin e presidentit të FIFA-s dhe nuk ka dhënë asnjë sinjal për largim. Megjithatë, polemikat e fundit kanë hapur një debat të ri për të ardhmen e drejtimit të futbollit botëror, ndërsa zgjedhjet e ardhshme presidenciale pritet të jenë ndër më të rëndësishmet e viteve të fundit.


Lajmi kryesor:

Përplasje e re për planin e privatizimit të Kupës së Botës, UEFA kërcënon FIFA-n me veprime ligjore! Tre federata tërheqin mbështetjen për Infantinon