Peza: Qeveria fushatë terrori, po
heq nga puna mbështetësit e mi

TIRANE - Kandidati i Partisë Socialiste për Peqinin, Alfred Peza i prezantuar prej një jave përpara strukturave të PS akuzon qeverinë se ka filluar një fushatë kërcënimesh duke pushuar nga puna persona që kanë lidhje me të.

Lajmi është bërë publik nga vetë ish-gazetari, i cili në rrjetin social Facebook i ka dedikuar këtij fakti një status përmes së cilit shprehet se do t’i dërgojë prova presidentit Nishani, Kryeministrit Berisha dhe Ambasadorit të SHBA, BE, ODBE dhe mediave ndërkombëtare për akuzat që ai ngre.

“Miq! Dua të ndaj me ju, një shqetësim: Prej një javë, që nga prezantimi im përpara strukturave të PS, miqve dhe simpatizantëve të mi të shumtë në Peqin, si kandidat për deputet, e gjithë qeveria me strukturat e saj qendrore dhe lokale, kanë filluar një fushatë të jashtëzakonshme dhune, terrori dhe kërcënimesh. Duke instaluar në Peqin, "Diktaturën e çapës së bukës". Janë pushuar njerëz nga puna dhe kërcënohet çdo person që takon me mua. Për këtë situatë, kërkoj solidaritetin tuaj. Ne kurrë nuk do përkulemi përpara asnjë situatë. Fitorja jonë e thellë dhe spektakolare më 23 Qershor, i ka futur tmerrin të gjithë fajtorëve.
Sot përgatis një njoftim me të gjitha provat dhe do ia dërgoj Presidentit Nishani, Kryeministrit Berisha, Ambasadorit të SHBA, BE, OSBE dhe të gjitha mediave ndërkombëtare. Përqafime”, shkruan Alfred Peza në Facebook.

Redaksia Online
(Gre.M/Shqiptarja.com)

TAG:
• OSBE