Platini: Droni mjet i rrezikshëm
po sikur të kishte pasur bombë?

Presidenti i UEFA-s Mishel Platini, në një intervistë për televizionin francez TF1, e ka cilësuar si të rrezikshëm dronin që mbajti të valëvitur flamurin kuqezi në Beograd, pasi sipas tij në mjetin e komanduar mund të kishte edhe një bombë.

Sipas Platini, të tilla veprime kanë një rrezikshmëri të lartë, veçanërisht në ato vende që kanë tension të lartë politik.

"Imagjinoni nëse në dron të kishte pasur një bombë. Incidentet e ndeshjes Serbi-Shqipëri janë të turpshme, të imagjinojmë se çfarë do të kishte ndodhur nëse nën dron do kishte pasur një bombë, është shumë e rrezikshme, veçanërisht në ato vende ku tensioni politik është i lartë.” tha Michel Platini.



Presidenti i UEFA-s tha se organi i lartë i futbollit ka nisur procedimin disiplinor ndaj dy ekipeve kombëtare, në incidentin që ai e quajti si të “pafalshëm”, për një ndeshje të këtij niveli. Platini theksoi se sporti duhet të bashkojë njerëzit dhe se politika nuk duhet të bëhet pjesë e një ndeshje sportive.

"Futbolli është menduar për të sjellë njerëzit së bashku dhe loja jonë nuk duhet të përzihen me politikën e çdo lloji. Skenat në Beograd mbrëmë ishin të pafalshme." tha presidenti i UEFA.

Edhe presidenti i FIFA Sepp Blatter dënoi atë çka ndodhi në Beograd, duke u shprehur se futbolli nuk duhet të përdoret për mesazhe politike.  

"Futbolli nuk duhet të përdoret për mesazhe politike. Dënoj me forcë atë që ndodhi në Beograd." shkruan Blatter në Tëitter

Ndeshja Serbi-Shqipëri u pezullua në pjesën e parë pasi droni me flamurin e “Shqipërisë së Madhe” fluturoi mbi stadiumin çka shkaktoi një përleshje në mes të tifozëve dhe të lojtarëve të kombëtares sonë.

UEFA ka nisur dje zyrtarisht procedimin disiplinor për të dyja ekipet, ndërsa vendimi përfundimtar do të jepet të enjten më 23 tetor, një ditë pas vizitës zyrtare të Ramës në Beograd.  

Redaksia Online
(e.c/shqiptarja.com)