Banorët e Shtiqënit dhe Nangës dolën në protestë para Bashkisë Kukës, duke kërkuar ndërhyrje për mungesën e ujit vaditës në tokat bujqësore që furnizohen nga Kanali i Shtiqënit.

Sipas tyre, prej disa ditësh uji nuk po mbërrin në tokat bujqësore, duke vënë në rrezik prodhimet e sezonit. Banorët pretendojnë se një pjesë e burimeve ujore po shfrytëzohet për prodhimin e energjisë elektrike nga hidrocentralet, ndërsa vaditja e tokave po mbetet pa zgjidhje.

Ata i referohen marrëveshjes sipas së cilës, nga 15 maji deri më 15 shtator, duhet të garantohet furnizimi me ujë për vaditjen.

“Këtu nuk e vë kush ujin në zjarr. Sot s’po kemi ujë as për vaditje as për të pirë”, tha një banor.

Banorët shprehen se situata është veçanërisht shqetësuese për familjet që sigurojnë të ardhurat nga bujqësia, pasi mungesa e ujit vadites ka tharë të mbjellat dhe të sjellë humbje ekonomike.

"Këtu nuk kemi pikë ujë. Prodhimi është zero. Ia kanë ndaluar ujë fshatit”, thotë një tjetër.

“Jemi bërë si shkretëtirë. Që prej tre vitesh kanali i Shtiqënit nuk ka ujë, sepse ia kalojnë hidrocentraleve”, tha një banor.

Përballë shqetësimit të tyre, Kryetari i Bashkisë Kukës, Albert Halilaj, zhvilloi një takim me banorët. Sipas tyre, gjatë takimit u diskutua për gjetjen e një zgjidhjeje konkrete dhe u ra dakord që më 3 shtator të zhvillohet një takim në fshatin Shtiqën.

Në këtë takim pritet të marrin pjesë edhe institucionet përgjegjëse për administrimin dhe menaxhimin e burimeve ujore, me synimin për të zgjidhur problemin e furnizimit me ujë vaditës.Sinkron:Arben Trota organizator I protestes.

Kanali i Shtiqënit shërben për vaditjen e rreth 820 hektarëve tokë bujqësore. Aktualisht, rreth 120 hektarë janë të mbjella me misër, jonxhë dhe grurë, duke e bërë furnizimin me ujë një çështje të rëndësishme për fermerët e zonës.