Zëdhënësja për Punët e Jashtme dhe Politikat e Sigurisë, Politikat Evropiane të Fqinjësisë dhe Negociatat e Zgjerimit shprehet se BE ka besimin tek ambasadorja dhe gjithë i ekipi për përkushtimin dhe profesionalizmin e tyre.
Gjithashtu Bashkimi Europian thekson se delegacioni do të vazhdojë që të monitorojë zbatimin e reformës në sistemin gjyqësor.
“Bashkimi Evropian shpreh keqardhje për shpifjet që janë shfaqur në shtyp kundër Delegacionit të BE-së dhe Kreut të Delegacionit në Shqipëri, Ambasadores Romana Vlahutin.
BE-ja shpreh besimin dhe mbështetjen e plotë tek Ambasadorja dhe gjithë i ekipi për përkushtimin dhe profesionalizmin e tyre.
Delegacioni do të vazhdojë, me përkushtim dhe në koordinim të ngushtë me institucionet e BE-së, ta shoqërojë Shqipërinë në reformën e saj të vështirë të shtetit ligjor për të vendosur një sistem gjyqësor të qëndrueshëm dhe të besueshëm, të cilin qytetarët e Shqipërisë e duan dhe e meritojnë" thuhet në deklaratën e BE.
Reagimi i BE vjen pas deklaratave të javëve të fundit kundër saj lidhur me zbatimin e reformës në sistemin e drejtësisë dhe lajmeve për procedurën e blerjes së vilës së delegacionit në Shqipëri.
Procedura e blerja së vilës 1.6 milionë euro në një fshat turistik në periferi të Tiranës si rezidencë të BE-së, e vendosi ambasadoren e unionit Romana Vlahutin në qendër të akuzave mediatike, por BE në reagimin e fundit, ashtu sikur edhe pak ditë më parë shprehet në krah të përfaqësueses së saj në Shqipëri duke e mbështetur plotësisht.
dy.b/shqiptarja.com