Portali i Berishës kërkon shpalljen non grata të ambasadorit të BE për ‘minim të demokracisë shqiptare’

Është ironike, por televizioni dhe portali i familjes Berisha kërkon shpalljen “non grata” të ambasadorit të BE-së në Tiranë, Lugi Soreca, për “minim të demokracisë shqiptare”.

Si argument, mediat e Sali Berishës përdorin akuzat e një kamikaze të Aleancës për Teatrin, që akuzon ambasadorin Soreca se është takuar fshehurazi me kryetaren e Gjykatës Kushtetuese, takim, që sipas saj, u zbulua nga një taksixhi që punon aty.

Por ironia e madhe është se mediat e Berishës kërkojnë shpalljen “non grata” të Sorecas, për… “minim të demokracisë shqiptare”.

Njësoj siç ka shpallur SHBA vetë Berishën “non grata”, për “minim të demokracisë shqiptare”.

Me sa duket Berisha kërkon të ketë një “bashkëfajtor” që ka minuar demokracinë shqiptare, por e ka të kotë, pasi nuk mund ta heqë më damkën që i ka vendos SHBA.

Ja çfarë shkruan portali i Berishës, si editorial:

“Pse Luigi Soreca që shkëlqen me praninë e tij në çdo lloj aktiviteti të Erion Veliajt në sheshet e Tiranës, zgjodhi të hyjë e të dalë tinazi nga dera e pasme Gjykatës Kushtetuese? Pse reagimi i Delegacionit të BE-së ndryshe nga herët e tjera, nuk është këshillues, por kërcënues për trupën e Aleancës për Teatrin?

Dhe më e rëndësishmja, çfarë pune ka Luigi Soreca të takojë krerët e organeve të drejtësisë së Re të Shqipërisë, makar edhe koleget e tij ‘fuqiplotë’ në Tiranë? Pyetjet janë retorike, dhe përgjigja është po aty.

Fjala vjen, Luigi Soreca njihet si një nga njohësit më të mirë të luftës kundër pastrimit të parave të krimit të organizuar. A e keni dëgjuar Luigi Sorecan të thotë një fjalë për përgjimet e Antimafias Italiane që na treguan se tentativa për pastrimin e parave kishin mbërritur deri në zyrën e Erion Veliajt.

Nuk ka sot asnjë mëndje sadopak e kthjelltë të vërë në diskutim faktin se Tirana me shumë gjasë është shndërruar në lavatriçen më të madhe të pastrimit të parave në Ballkan, dhe kjo nuk mund të ndodhë pa firmën e Erion Veliajt që punon si makinë qepëse pa pushim në dëm të interesit dhe pronës publike në kryeqytet.

Ky qëndrim i heshtur i ‘mikut’ special të Erion Veliajt në krye të delegacionit të BE-së na bën të dyshojmë fort edhe për takimin që Luigi Soreca zhvilloi pak ditë më parë kur takoi kreun e SPAK, Arben Kraja e ku teme e takimit ishte pikërisht lufta kundër pastrimit të parave të krimit të organizuar.

Juristi i mirënjohur Gerti Shella, me të drejtë shkruan se sot se; ‘Do të ishte më produktive që, në vigjilje të vendimarrjes historike të Gjykatës Kushtetuese mbi shembjen e Teatrit, ambasadori Soreca dhe trupa shumë e respektuar diplomatike në Shqipëri të apelonin publikisht Gjykatën Kushtetuese për gjykim dhe drejtësi të pavarur nga çdo lloj ndikimi. Ky do të ishte kontributi më i mirë i mundshëm që drejtësia e re të inkurajohet nga mbështetja parimore e partnerëve tanë të vyer.’

Aleanca për Teatrin, trupa më qëndrestare në 30 vitet e fundit për një kauzë në shërbim të interesit dhe nderit publik, na kanë bërë një tjetër shërbim të madh. Ata kanë bërë akuzën më serioze (të munguar madje) në raport me aktivitetin okult të ambasadorëve të huaj që veprojnë në Shqipëri.

Nga sot Luigi Soreca do të duhej të shpallej (non grata) në Shqipëri, sepse dyshimet janë më shumë se të forta që ai ka minuar demokracinë në Shqipëri në dëm të interesit kombëtar të Shqipërisë duke ndërhyrë në vendimmarrjen e Gjykatës së Kushtetutës së Shqipërisë. Një vend normal do të vepronte kështu, dhe vetëm kështu ndoshta ne do të rifillonim të kthehemi në vend normal”./TEMA 

SI.E./Shqiptarja.com

TAG:
• BE
• SHBA
• sali berisha
• Luigi Soreca
• Berisha ne listen e zeze te SHBA