Presidenti Bajram Begaj organizoi mbrëmjen e së premtes një ceremoni në Presidencë me rastin e 113-vjetorit të Pavarësisë së vendit. Të pranishëm në pritjen e kreut të shtetit ishin edhe kryeministri Edi Rama me bashkëshorten e tij, Linda Rama, si dhe presidentja e Kosovës, Vjosa Osmani.

Në fjalën e tij, Begaj tha se pas më shumë se një shekulli si shtet i pavarur, Shqipëria ka krijuar sot një imazh serioz në arenën ndërkombëtare dhe është bërë një partner i besueshëm i fuqive rajonale por edhe atyre të mëdha botërore. 

Rëndësi të veçantë presidenti Begaj i kushtoi diasporës shqiptare, për të cilën tha se është një urë e fuqishme e Shqipërisë me botën.

"Është zemra jonë që rreh larg, detyra jonë si shtet është t’i dëgjojmë, t’i përfshijmë dhe t’u krijojmë hapësira reale pjesëmarrjeje. Pavarësia matet me cilësinë e shërbimeve publike, me drejtësinë funksionale, me mundësinë që u ofrojmë të rinjve dhe dashurinë për atdheun. Këto janë sfidat që na bashkojnë – pavarësisht bindjeve tona politike. Bota e sotme po ndryshon me shpejtësi, arkitektura globale po rifigurohet. Në këto kohë transformimesh dhe tronditjesh na duhet vendosmëri e qartë dhe vizion. Viti 2025 na gjeti në një mjedis dinamik.  Shqipëria ka fituar besueshmëri si vend që kontribuon në paqen dhe sigurinë dhe dialog. Shqipëria mbetet e besueshme për aleatët tanë euroatlantikë. Ne jemi krenar për lidhjen me Shtetet e Bashkuara të Amerikës",- tha kreu i shtetit.

Presidenti Begaj theksoi nevojën e bashkimit dhe forcimit të faktorit shqiptar në Ballkan, si një rrugë më e sigurt për përparimin e kombit dhe mirëqenien e çdo bashkëatdhetari në rajon dhe jo vetëm.

"Fatet tona u ndanë kundër dëshirës tonë, sot fati i Shqipërisë dhe i Kosovës dhe i gjithë shqiptarëve në rajon është në duart tona. Çdo arritje e Kosovës dhe e komuniteteve shqiptare në rajon është krenari për ne. Sot kudo ku jetojnë shqiptarët është ditë feste. Është koha të jemi bashkë, të mbështesim zhvillimin e komuniteteve shqiptare dhe të punojmë që çdo shqiptar brenda e jashtë vendit të ndihet pjesë e një kombi që ecën përpara",- tha Begaj.

Në fund të fjalës së tij, kreu i shtetit ngriti një dolli me 3 "shëndete".

"Shëndeti i parë është për Ditën e Flamurit, urimi i dytë për flamurin kuq e zi dhe urimi i tretë është për kombin shqiptar! Lavdi përjetë',- uroi Begaj.

Rendit zhvillimet sipas orarit:
Ora 22:10
113 vite pavarësi/ Rama ndan foto nga ceremonia në Presidencë: E organizuar bukur si asnjëherë, me praninë kuptimplotë edhe të Osmanit

 

Kryeministri Edi Rama, ka ndarë disa foto nga ceremonia që organizoi presidenti Bajram Begaj në Presidencë me rastin e 113-vjetorit të pavarësisë së vendit.

Përmes një postimi në rrjetet sociale, Rama e cilësoi atë si një mbrëmje të organizuar bukur.

'Mbrëmja Tradicionale Kuqezi e Ditës së Pavarësisë, organizuar sonte bukur si asnjëherë nën kujdesin e Presidentit të Republikës, me praninë kuptimplotë të Presidentes së Kosovës', shkruan Edi Rama.

S.B/Shqiptarja.com