TIRANE -Presidenti i Republikës, Bamir Topi dekoroi sot personalitete të ndryshme me kontribute të rëndësishëm në rrëzimin e diktaturës komuniste, ndërtimin e demokracisë shqiptare dhe lartësimin e vlerave kombëtare.

Në ceremoninë e organizuar në Presidencë, Kreu i Shtetit u dorëzoi medaljet të dekoruarve dhe familjarëve të tyre, duke nderuar me Medaljen "Martir i Demokracisë", Mark Nikoll Sokolin (Pas vdekjes); Gjergj Nikoll Sokolin (Pas vdekjes), dhe Hysni Mersin Hysën (Pas vdekjes).

Me Medaljen "Pishtar i Demokracisë" Presidenti dekoroi Ardian Elezin, ndërsa me "Medaljen e Mirënjohjes" Raif Elezin, Gëzim Kalanë, Adrian Katin, Ylli Tasin, Ylli Tabakun, etj.

Të pranishëm në këtë ceremoni ishin Ambasadori i Mbretërisë së Danimarkës Karsten Ankjaer Jensen, Avokati i Popullit, Igli Totozani, drejtues të Shoqatës Mbarëkombëtare për Integrimin e të Burgosurve dhe të Përndjekurve Politikë, familjarë, etj.
(sg/atsh/shqiptarja.com)