Prioritetet e KE, Gjosha në Bruksel
"Udhërrëfyesi me masa ambicioze"

BRUKSEL - Ministrja e integrimit Evropian,  Klajda Gjosha mori sot pjesë në Bruksel në  Konferencën “Shteti i së drejtës dhe procesi i reformave në Shqipëri”, organizuar nga  Fondacioni Hanns Seidel.
 
Gjatë fjalës së saj Ministrja e Integrimit Evropian theksoi se: “Qeveria e re që pas marrjes së mandatit është angazhuar maksimalisht, për të afruar Shqipërinë me Bashkimin Evropian, duke ndërmarrë një sërë masash për forcimin e shtetit të së drejtës.”
 
Duke u ndalur te “Road Map” për zbatimin 5 prioriteteve të lëna nga Komisioni Evropian, Ministrja Gjosha deklaroi se “udhërrëfyesi i hartuar nga qeveria përmban masa ambicioze të cilat do të sjellin rezultate në luftën kundër korrupsionit, krimit të organizuar, krijimin e një administrate publike efiçente, reformimin e sistemit  gjyqësor, duke sjellë demokratizimin e mëtejshëm të  vendit”.
 
“Vetëm duke krijuar një shtet ligjor ku respektohen të drejtat e secilit prej nesh,ne do të mund të  ofrojmë siguri se  meritojmë të jemi pjesë e kësaj familjeje të madhe jo vetëm gjeografikisht.” tha Ministrja Gjosha.
 
Ministrja u ndal konkretisht në punën e bërë për secilin nga 5 prioritetet duke theksuar se Shqipëria është e vendosur të ecë përpara në udhëtimin e saj drejt Evropës. Gjosha u shpreh se qeveria do të ruajë të njëjtin ritëm në realizimin e reformave, pasi ato i shërbejnë të ardhmes së vendit. 
 
“Për ne çdo hap i hedhur drejt Bashkimit Evropian është një nxitje më shumë për të mos u ndalur në përpjekjen e përditshme, për t’u ofruar qytetarëve tanë të njëjtat standarde si  ato të vendeve të BE”,-tha Ministrja Gjosha. 
 
I pranishëm në këtë konferencë ishte edhe shefi i Njësisë për Shqipërinë në Komisionin Evropian Vassilis Maragos i cili u shpreh se: “Vërehet përkushtim nga pala shqiptare në lidhje me reformat që duhen  ndërmarrë , duke theksuar se Komisioni do të ofrojë gjithë asistencën e nevojshme në funksion të procesit të integrimit.”
 
Kryetari i Gjykatës së Lartë Xhezair Zaganjori, i pranishëm në këtë konferencë, vlerësoi bashkëpunimin me Ministrinë e Drejtësisë dhe Parlamentin, duke theksuar nevojën e reformave në sistemin Gjyqësor.
 
Redaksia Online
(a.h/shqiptarja.com)