Prishtinë, deputetë dhe profesorë
me punime shkencore false

PRISHTINË- Disa deputetë dhe profesorë të shkollave të larta në Prishtinë, dyshohen se kanë botuar shkrime shkencore në revista të dyshimta.
 
Kështu, deputetja e LDK-së, Afërdita Berisha Shaqiri, deputetja e PDK-së, ish-ministrja, Justina Shiroka Pula dhe dekani i Ekonomikut, Skënder Ahmeti janë ndër ata, që dyshohen se kanë botuar në revista të dyshimta, raporton KTV, e tillë siç është “David Publishing”.
 
Kjo revistë amerikano-kineze u shkruan të interesuarve që të botojnë në të, për një shumë që zakonisht është 50 dollarë.

Publikimi në revista që lehtë në internet mund të identifikohen si të rreme, duket të ketë qenë praktikë e zakonshme për Universitetin e Prishtinës.
 
Afërdita Berisha Shaqiri, jo shumë e përfshirë në krizën e fundit që ka përfshirë Universitetin e Prishtinës, është bashkautore e publikimit: “Teknologjia informative dhe dixhitalizimi në tregun ekonomik dhe konkurrenca”.
 
Ky është një punim 9 faqesh nga tre autorë dhe referencat e pakta janë nga një libër shqip, disa raporte të Komisionit Evropian dhe nga një raport i Ministrisë së Tregtisë dhe Industrisë.

Në po të njëjtën revistë ka publikuar edhe Justina Shiroka  Pula, deputete e PDK-së dhe ish-ministre e Energjisë në Qeverinë e Kosovës. 

Shiroka  Pula ka publikuar si bashkautore me dekanin e Ekonomikut, Skënder Ahmeti dhe me Venet Shalën punimin: “Rëndësia e investimeve në ndërmarrje të vogla e të mesme, rasti i Kosovës”.

Kërkimet e thjeshta në internet tregojnë se revista amerikano-kineze, kërkon vetëm 50 dollarë për publikimin e një punimi dhe se në fakt ajo vetë u dërgon e-mail-e individëve të ndryshëm, duke u kërkuar që t’i dërgojnë punimet e tyre.

Skandali më i ri në UP shpërtheu kur “Koha Ditore” raportoi se rektori Ibrahim Gashi kishte publikuar në një revistë të rreme indiane.
 
Që nga ajo kohë kanë vazhduar protestat studentore që kërkojnë shkarkimin e rektorit Gashi, ndërkohë që LDK-ja ka kërkuar debat parlamentar. 

Redaksia online
(esh/shqiptarja.com)