VLORË - Klubi i Futbollit Flamurtari është shumë pranë një prej ndryshimeve më të rëndësishme në historinë e tij, pasi privatizimi i shumëpritur pritet të nisë së shpejti. Këshilli Bashkiak i Vlorës do të mblidhet javën e ardhshme për të miratuar shtyrjen e afatit të administrimit aktual, por kësaj here me një ndryshim të rëndësishëm. Afati do të vlejë deri në nisjen e procedurës së privatizimit dhe jo më me një afat të përcaktuar njëvjeçar.

Sinan Idrizi, i cili ka administruar Flamurtarin që nga viti 2014, pritet të vazhdojë drejtimin deri në momentin kur do të zyrtarizohet kalimi te investitorët, me Idrizin që do jetë i pari që do kërkojë presidencën. Gjatë gjithë këtyre viteve, Idrizi ka mbajtur i vetëm barrën financiare të klubit, ndërsa Bashkia e Vlorës e cila është ende pronare ligjore e skuadrës, nuk ka kontribuar financiarisht për më shumë se një dekadë.

Vendimi që pritet të merret të enjten në mbledhjen e radhës të Këshillit Bashkiak shihet si hapi i parë konkret drejt privatizimit të Flamurtarit, një kërkesë që vetë Idrizi e ka përsëritur prej vitesh.

Ky zhvillim mund të hapë një kapitull të ri për klubin vlonjat, i cili kërkon suksesin pas rikthimit në elitë pas pesë vitesh.