Projekti/ Kodi Zgjedhor, partia
 e parë merr plus 20 deputetë

TIRANE- Nëse Partia Socialiste dhe ajo Demokratike bien dakord për ndryshime në Kodin Zgjedhor dhe zgjedhjen e sistemit me “prim”, dy modelet të cilëve mund t’u referohen janë: sistemi zgjedhor i Greqisë dhe ai i Spanjës. I pyetur për këtë çështje, Ministri i Pushtetit Vendor, Bledi Çuçi tha se këto mund të jenë modelet, por numri i deputetëve të cilët përthith automatikisht partia me numrin më të madh të votave, do të jetë i përshtatur sipas realitetit shqiptar.

“Referojuni modelit grek dhe spanjoll. Minimalisht duhet të jenë 20 deputetë, pra 20 deputet shkojnë plus te partia e parë, pastaj pjesa tjetër ndahen sipas votave për të gjitha partitë”,-tha ministri Çuçi, i cili saktësoi se këto janë vetëm modele. Por çfarë është sistemi “prim”? Sipas këtij sistemi, partia e cila merr më shumë vota, dhe renditet e para, qoftë edhe me një votë diferencë krahasuar me të dytën, ka të drejtën të përfitojë automatikisht një numër të caktuar deputetësh.