Protesta e PD-së, 7 të arrestuar, 21 protestues në hetim! Noka goditi efektivin, procedohet penalisht bashkë me 39 deputetë e zyrtarë të opozitës (EMRAT)

TIRANË - Shtatë protestues u arrestuan pas protestës së opozitës me bllokim rrugësh mbrëmjen e 23 dhjetorit, ndërsa 61 po hetohen mes të cilëve, 21 protestues, 26 zyrtarë të opozitës dhe 14 deputetë.

Këta të fundit, që ishin edhe drejtuesit kryesorë të organizimit në 5 nyjet që bllokuan, ishin protagonistë të përplasjeve më të ashpra me policisë, tashmë në hetim për bllokim të rrugëve, tubim të paligjshëm, mosbindje ndaj urdhrit të policisë, prishje e qetësisë publike dhe kundërshtim të policisë

Në hetim në gjendje të lirë është Flamur Noka i cili goditi me grusht policin pranë Xhamisë së Namasgjasë, aty ku drejtonte protestën, si dhe Xhelal Mziu, Albana Vokshi, Oerd Bylykbashi, Flamur Hoxha, Petrit Doda, Elda Hoti, Lefter Gështenja, Saimir Korreshi, Erisa Xhixho, Ina Zhupa, Ludovik Hasani si dhe kreu i grupit parlamentar të PD Gazment Bardhi, që u përlas me policinë në Sheshin Uillson

Në mesin e të hetuarve është edhe Agron Gjekmarkaj, i cili gjatë protestës u ndje keq dhe i ra të fikët.

Kjo situatë Gjekmarkaj tha se erdhi si pasojë e sulmeve të policisë, por uniformat blu e përgënjeshtruan duke thënë se nuk e goditën nënkryetarin e Kuvendit, pasi në momentin që ai është ndjerë keq, përreth tij nuk kishte asnjë efektiv.

Por Gjekmarkaj insistoi sërish edhe një ditë më pas.  

Arrestimet kreu i PD, Sali Berisha, që iu bashkua protestës për herë të parë që prej daljes nga izolimi, i komentoi si shenjë tmerri.

Mosbindja e djeshme ka tmerruar gjer në palcë Edi Ramën dhe narkokraturën e tyre, prandaj dhe dje u panë shfaqje nga më të shëmtuara dhe nga më qesharaket nga mashtrues të paguar dhe kriminelë me uniformë.

Deputetë të Kuvendit të Shqipërisë dhe/ose përfaqësues të Partisë Demokratike të Shqipërisë, Partisë Republikane ose Partisë së Lirisë akuzohen për veprat penale "Pengimi i qarkullimit të mjeteve të transportit", "Organizimi dhe pjesmarrja në grumbullime e manifestime të paligjshme", "Mosbindja ndaj urdhrave të punonjësit të rendit publik", "Prishja e rendit dhe e qetësisë publike" dhe "Kundërshtimi i punonjësit të policisë së rendit publik".', shton policia në njoftim.

Ndërkohë mes përfaqësuesve të opozitës në hetim janë dhe Çlirim Gjata, Lefter Maliqi, Tedi Blushi, Luçiano Boçi

Protestuesit e arrestuar në flagrancë 

 U proceduan penalisht, në gjendje të lirë, 21 shtetas, për veprat penale "Pengimi i qarkullimit të mjeteve të transportit", "Kundërshtimi i punonjësit të policisë së rendit publik" dhe “Organizimi dhe pjesëmarrja në grumbullime e manifestime të paligjshme”

Policia edhe para protestës por edhe gjatë saj u bëri thirrje protestuesve të mos bllokojnë rrugën pasi është vepër penale. Opozita bllokoi 5 akse të kryeqytetit, pranë bashkisë Tiranë, sheshi Uillson, Zogu i Zi, Pallati me Shigjeta dhe rruga e Elbasanit, nga ora 17:00 deri pak para orës 20:00.

'Nga hetimet e deritanishme rezulton se gjatë tubimeve të organizuara ditën e djeshme, deputetë ose përfaqësues të subjekteve politike Partia Demokratike e Shqipërisë, Partia Republikane dhe Partia e Lirisë iu kanë bërë thirrje tubuesve, që së bashku me ta, të bllokonin akset rrugore, në mënyrë që mos të kishte lëvizje të mjeteve. Tubuesit kanë kundërshtuar forcërisht punonjësit e Policisë në detyrë, si dhe nuk iu janë bindur urdhrave të tyre, për lirim të akseve rrugore, njoftoi policia e Tiranës.

G.K/A.Q/Shqiptarja.com

TAG:
• protesta e opozites
• flamur noka
• agron gjekmarkaj
• PD
• Arrestime
• protesta e 23 dhjetorit